發佈時間：13:00 2026-02-18
送蛇迎馬，2019年港姐冠軍黃嘉雯，上月率先行大運，有份擁有的團體馬「飛馬座」打開勝門，袋走254萬獎金。
「超開心！佢第4次出賽就贏冠軍，真係超班，可惜我當日冇入馬場。我諗住多啲探佢，同買多啲優質食材俾佢當獎勵。」
坐言起行，這天她到沙田馬房探望飛馬座，餵牠食紅蘿蔔，更預告會買多隻馬，「因為飛馬座腳頭好，已經賺返自己嘅奶粉錢，可以試吓再養多隻馬，可能都會用星座名，大家敬請期待。」
星座系列兵團，不日誕生。
改星座名
飛馬座馬如其名，跑得飛快，難怪極速交出亮麗成績表。「我有份俾意見改名㗎！我本身屬人馬座，覺得同馬不謀而合，都係不羈、放縱、愛自由，所以同人馬座有啲關係，加個飛字，就係希望佢跑得飛快，攞到冠軍。」
黃嘉雯摸摸愛駒，開心牠不負眾望，帶挈大家贏錢。她指每月養馬的支出，大約5、6位數字，而今次飛馬座贏第一，獎金主要會用在照顧牠的日常開支身上。
身為馬主，相信對賽馬有一定心得吧？
她笑說：「首先要研究嗰排騎師嘅表現，如果感覺到佢雄心壯志，或者想攞啲大賽盃，咁佢騎嘅馬就有保證。其次可以留意檔位，就算隻馬幾叻都好，如果檔位唔好，都有機會影響佢嘅成績。買馬真係講求天時地利人和，我落注唔會揀賠率低，因為冇乜意義，可能試吓博啲冷馬，飛馬座就係贏咗嘅冷馬代表。」
不過她強調小賭怡情，「我投注額唔大，好少用5位數字，記住要買一個輸咗都冇所謂嘅銀碼就OK。」
飛馬座本月8日再次出賽，賽前黃嘉雯出席了練馬師徐雨石的馬房慶功宴，兼順道食團年飯，雖然未能梅開二度，但就成為賽事亮點。
非洲騎馬
在黃嘉雯的心目中，飛馬座性情溫和。「我以前學過騎馬，可能嗰啲馬唔係成日見，佢哋會好似同你冇乜交流，但飛馬座唔同，可能見得多啲，我覺得佢認得我，我又識點同佢相處、掂佢，因為通常啲人初初接觸馬，見到咁大隻會好驚。今次養呢隻馬，令我大膽咗，對馬認識多咗，知道所有動物無論咩size都好，只要花時間了解佢哋，都一樣咁可愛。」
飛馬座跑出好成績，為她和一班朋友打下強心針，考慮買多隻馬，「連名都有諗過，叫乜乜座，但想神秘少少，遲啲先公布。」
回想起第一次接觸馬，要數2020年疫情的時候。當時黃嘉雯報名學騎馬，心想將來拍古裝片時可大派用場，結果夏天上堂，不單止她覺得熱爆，連隻馬都不耐煩，加上牠不斷被蚊圍，最後停學了。
做馬主，令黃嘉雯愛上馬，寫下一張人生清單。「我未試過去外地睇賽馬，去泰國騎馬就有。其實我好想試一次去非洲，一邊騎馬，一邊睇動物大遷徙，我覺得係好正嘅經驗。」
整糕賀年
人大了，黃嘉雯說比較喜歡和家人在一起，所以今個新年，她會留港度歲。「去旅行隨時都得啦！我有好多表哥、表姐，又有好多姪仔、姪女，多到就嚟唔記得啲名，佢哋又大得好快。趁新年可以好好敘舊，食吓飯，打吓麻雀。」
黃嘉雯聲言會下廚大顯身手，招呼朋友，「我仲試過整蘿蔔糕俾我隻狗狗食，佢哋好好，唔會嫌棄，煮乜都會食到舔舔脷。」
談到新年願望，她希望事業上有突破。「做寵物事業，自己可以主動啲，但演藝事業方面，好睇天時地利人和，希望今年做到一個喜歡嘅角色。我咩都試，可以係同我形象好唔同嘅，例如之前拍《下流上車族》演小三，又或者喺一套未播出街嘅劇集入面演殺人犯，即係大家唔會估到我會做嘅角色。唔好睇我斯斯文文，其實我想做打女㖭！」
那麼，對飛馬座又有甚麼期望？她說：「聽練馬師講，馬最好嘅歲數係4、5歲，飛馬座咁啱呢一年係， 而今年又係馬嘅本命年。加上我屬雞，又係我好旺嘅一年，睇八字話我要木火，今年木火好旺，所以我希望同佢2026年一齊win win，好有信心繼續贏。」
強強聯手，馬上送上祝福。
