發佈時間：15:00 2026-02-20
話咁快又到農曆新年！
城中名人除了提早購置新衣和布置家居，大家亦忙着辦年貨。
以往過年必定提早揀定靚靚蘭花送贈親友的莊思敏，今年搞搞新意思，親手造了多幅珍珠畫作為賀年禮物。
「每到農曆新年，都習慣買啲禮物送俾家中長輩，但咁多年來來去去都係買蘭花同一啲應節食品。早前上網見到呢啲珍珠畫幾靚，於是就買咗一幅返嚟砌，完成後覺得幾有新年氣氛，長輩應該會鍾意，於是今年就親手造咗幾幅。最正係自己有得玩，又可以送禮，珍珠、珍珠、諸（珠）事吉祥！幾好意頭呀！」
招財進寶 福運乾坤
臨近新年，莊思敏一有空閒時間，就埋手砌賀年珍珠畫，先後完成了一幅名為「福運乾坤」的金葫蘆和「招財進寶」的招財貓。這天訪問，她更示範造一幅「鯉躍龍門」。「開頭以為好難整，因為每幅畫由唔同大細的珍珠組合而成，但買回來後先發現原來好輕鬆，只要跟着圖紙上的步驟去整，基本上冇乜難度，不過視力就要夠好，因為有啲珍珠好細粒，專注整大約兩個鐘就可以完成一幅，而每幅都好有賀年氣氛，相信收到嘅人都會開心，可以掛喺屋企應節。」
經常在內地工作的她，近日更隨身帶着未完成的珍珠畫同行，「因為到大灣區工作，我通常自己駕車北上，所以早前就擺定一幅畫喺車，方便工作與工作之間的碎片時間可以整吓。」
她笑言自己沒藝術天份，這些有圖樣的手作很適合她，「由細到大我都冇做過太多手作，要我由一張白紙畫出一幅畫，難度極高。之前買咗一啲油彩畫和填色畫，諗住訓練耐性，但買完一直擺咗喺度。而呢啲珍珠畫，比puzzle和Lego更簡單，同埋玩玩吓可以隨時停低。喺呢個網上充斥垃級資訊嘅年代，可以俾自己適當時候放低手機，去專注做一件事，都係一個俾自己精神放鬆嘅機會。而且價錢仲要好平，幾十蚊到幾百蚊就有交易。」
合家團圓 馬年進步
生於大家族的她，父親是已故的大馬拿督莊寶，自小屋企就對農曆新年相當講究，「細個屋企過年啲習俗多到爆，過年前要抹屋大掃除，買年花、貼揮春、擺好全盒，仲要剪頭髮、剪指甲，團年飯要有幾多道菜，咩菜式全部都講究，年三十晚特別忙，因為要趕喺11點子時沖好晒涼、洗埋頭，到大年初一全身內外都要新衫，唔可以講唔吉利說話。不過隨着時代轉變，近年都一切從簡。」
去年再度成為人妻的她笑言，夫家長輩沒有太多習俗，「老爺奶奶都好開明，都係簡簡單單，團年飯邊度食，食啲乜都冇所謂，最緊要一家人聚埋一齊開開心心。我哋都係買啲蘭花布置增添賀年氣氛，同貼一啲新式潮語揮春。」
問她馬年願望，她說：「蛇年喺內地發展得幾好，無論做直播、拍短視頻和豎屏短劇，都做到成績，希望到馬年繼續穩步上揚。而馬年我仲會創造一個A1莊思敏，做我做唔到嘅嘢，就係以歌手身份出現。內地各方面發展太快，部分演出已融入AI，所以無論做直播或演員，都要緊貼科技和潮流，先可以與時並進。」
延伸內容：女星潮打回春針│60歲羅霖成功凍齡│莊思敏豪使10萬元做最靚新娘│梁芷珮帶家人啪針治舊患
延伸內容：莊思敏峇里島閃婚甜到爆 超Deep V婚紗勁吸睛 奉子成婚？她咁樣回應
延伸內容：45歲莊思敏離婚3年 閃嫁高級督察 「新郎哥」真身曝光 高大靚仔似林峯
《東周網》訪談系列節目《星桄伴我心》2月重磅嘉賓：
即睇：江欣燕親揭變胖因由│輕狂靡爛歲月 醉倒餐枱底瞓天光│小產BB入樽放睡房 發生靈異事件
即睇：實測Silly程度 帶陳國邦去沙灘𥄫女｜送石油氣爐畀羅敏莊最浪漫 ｜《尋秦記》謝票收花超窩心
即睇：黃凱芹大逼供｜有冇同過周慧敏拍過拖？｜有冇秘密生仔做爸爸？｜有冇內疚心事對亡父說？
即睇：馬德鐘眼濕濕憶亡母：我好痛！ | 難忘當差亡命飛車追賊 | 肉搏朱茵真相 婚姻傳曾亮紅燈
立即追蹤《東周刊》全新WhatsApp頻道，緊貼全城熱話、突發猛料、獨家消息！
