發佈時間：15:25 2026-02-07
敖嘉年去年因拍攝素食節目，花了逾半年時間，不停中港兩邊走，遊遍內地包括青海、陝西、雲南等多個大西北省市，之後再南下廣東。期間他邊拍邊玩，除了睇靚景，食好西，更走進山野森林、農耕民居，尋覓最鮮的「素」材。
「大西北好多地方都好靚，途上遇到好多當地人都親切，知我哋嚟拍嘢都好熱情接待，今次既深入了解到不同地區的風土民情，又食到風味獨特的精緻素食，𠵱家諗番都流晒口水呀！」
昆崙山下摘沙漠杞子
為拍攝節目，敖嘉年自去年中，先後到過內地大西北多個省巿，更到達海拔3700米的青藏高原尋覓素食，「過去半年我去過大西北好多省巿，包括青海西寧、格爾木、甘肅蘭州、陝西、雲南昆明、普洱，和中緬邊境的高黎貢山等，除了尋找高品質素食，亦行到邊睇到邊。」
其中在青海格爾木，昆崙山下的戈壁沙漠，就找到一個靠引雪山流下來的水種植的杞子農場，「昆崙山下的戈壁沙漠氣候好乾，但裏面竟然有一個農場種植有機杞子樹，灌溉的水源引自昆崙山上的雪山，用雪山水種出來的杞子超大粒，喺樹上摘落嚟可以即食，勁新鮮。不過呢個農場方圓20幾公里真係渺無人煙，周邊仲有熊和豺狼等，如果冇任何裝備行出去，真係會死人㗎！而最特別係昆崙山入面仲有一個金礦，入面有幾棵種植咗600到1000年的杞子樹，因為係受保護區域，我哋要當地政府安排先可以入去。」
由於昆崙山位處高原地帶，他和團隊每日都有不同程度的高山反應，「農場周邊喺海拔3500-3700米高原，我哋每晚喺酒店瞓到半夜3、4點都突然『扯蝦』扯醒，唔夠氧氣呀！晚晚都係咁，直至離開高原地帶先冇事。而最搞笑係我哋冇預計過有啲地區天氣會咁凍，有次帶唔夠衫，我哋要將所有底衫着晒上身保暖。」
高黎貢山掘野生松露
之後為找最靚的野生松露，他輾轉去到雲南省接近中緬邊境的高黎貢山，「我哋先坐咗6個幾鐘高鐵，再坐6個幾鐘車先到達高黎貢山，因為好近緬甸，路上途經一啲關卡都有持槍嘅警察上車檢查證件。要去咁偏遠嘅地區，因為貢山入面有好多野山嘅黑松露同白松露。」
由於當地政府每年都會封山護養土壤，以保障來年收成，想搵到最靚的松露，就要看準時機，趁開山季節進入貢山尋寶。「我哋去到撞正開山節，掘到嘅松露都係品質最高，有啲黑松露一隻大個我個頭，同我喺香港超巿見到嘅size簡直係天淵之別；而白松露就細粒啲，但都超新鮮，全部都可以切片醮上醬料即食。」
他又表示貢山周邊風景超靚，「早上啲雲會喺酒店下面不斷湧現，腳下係層層雲海好夢幻，但到早上9點會逐漸散退，從酒店望出會見到中間有座雪山，附近還有條著名的怒江，周邊環境幽靜，景色靚到不得了，人傑地靈空氣又好，但真係好遠。」
難忘途上風景人和事
半年大西北之行，敖嘉年除了覓得不少矜貴素材，還品嘗到不少地方的精緻素食，「最難忘喺雲南石屏食過一款『酸水點豆腐』。造豆腐嘅水來自一個古井，井水個PH值係8.5，酸性高唔適合飲用，但有人發現用呢啲井水造出嚟嘅豆腐好好食，最神奇係將井水加入豆漿攪勻，就自動變成豆腐，完全唔使加石膏粉，再擺7日，仲會變成好好味嘅臭豆腐，呢款石屏豆腐𠵱家喺國內已經好出名。仲有要種9年先有收成嘅鮮百合，和陝西嘅酸湯粉，食完到𠵱家都好想再食。」
除了美食，途上風景以及人和事，亦令他留下深刻記憶，「雲南石屏古城附近有個異龍湖，風景好靚，民風又僕素，記得有日落大雨，我哋成隊crew企咗喺一間舖頭門外帳篷避雨，點知舖內有個男人行出嚟，問我哋企喺度做乜？睇佢個樣高高大大，黑黑實實，以為佢趕我哋走啦，點知聽見我哋話避雨，佢馬上請我哋入去舖頭，俾櫈我哋坐，又俾茶我哋飲，原來佢係老闆，俾我哋感受到當地人好客熱情。我哋個節目叫《橫素全中國》，除咗大西北，我哋之後仲會繼續去其他省巿發掘更多更好嘅素食。」
延伸內容：敖嘉年獻唱《月亮代表我的心》冧爆全場媽媽
延伸內容：終於在眼淚中明白 林保怡 陳敏之 敖嘉年
延伸內容：母親節動人系列︱父母離異不覺苦 敖嘉年自滿有個強媽媽
《東周網》訪談系列節目《星桄伴我心》2月重磅嘉賓：
即睇：江欣燕親揭變胖因由│輕狂靡爛歲月 醉倒餐枱底瞓天光│小產BB入樽放睡房 發生靈異事件
即睇：實測Silly程度 帶陳國邦去沙灘𥄫女｜送石油氣爐畀羅敏莊最浪漫 ｜《尋秦記》謝票收花超窩心
立即追蹤《東周刊》全新WhatsApp頻道，緊貼全城熱話、突發猛料、獨家消息！
