更新時間：18:47 2026-01-21
發佈時間：18:47 2026-01-21
發佈時間：18:47 2026-01-21
一個殺手，加一個小妹妹，自然令人諗起尚連奴同妮妲莉寶雯合演嘅經典電影《這個殺手不太冷》。咁啱得咁蹺，新片《怪奇魔塵事件》（Dust Bunny）都係呢個配搭，玩法係殺手變成康城影帝麥斯米基辛（Mads Mikkelsen），有一日收到10歲鄰居小妹妹蘇菲斯隆（Sophie Sloan）出錢委託，要佢幫手殺死匿喺佢床下底、食咗佢屋企人落肚嘅怪物。聽見第一個反應，會覺得小妹妹想像力太豐富，但麥斯偏偏決定接手，首要任務就係要保護小妹妹嘅安全。
麥斯米基辛向李小龍致敬
丹麥男星麥斯米基辛，過往演過《奇異博士》、《怪獸與鄧不利多的秘密》等電影，多數以反派角色示人，今次同初次執導電影嘅布萊恩富勒（Bryan Fuller）合作，就得到佢度身訂造角色，飾演一個神祕殺手鄰居，有好多打到飛起嘅場面，其中一幕更會耍雙節棍向偶像李小龍致敬。
麥斯話：「其實我自小已經想成為特技演員，不斷將自己撻來撻去，加上練過體操，對於做特技動作非常有用。今次拍戲，能夠有一瞬間當自己係李小龍，感覺好爽。」
導演布萊自言用心良苦，將麥斯私底下童心未泯嘅一面融入殺手角色之中，「其實佢真人同鏡頭前嘅反差萌好大，佢好百厭，係嗰種打保齡球時，會偷走人哋隻鞋嘅人！」
蘇菲短時間學識美國口音
片中，麥斯自身難保，但因為深信小妹妹蘇菲斯隆嘅家人係被自己嘅仇家誤殺，於是誓要保護對方。提到同呢位蘇格蘭新生代童星合作，麥斯話：「呢個係最好玩嘅地方，兩個冇乜社交技巧嘅角色要講好多對白，我仲要成日窒佢。咪睇蘇菲係細路女，佢好專業，可以喺短時間內隱藏蘇格蘭口音，學識美國口音，我呢啲老餅就唔得喇。」
上映日期：1月22日
《東周網》訪談系列節目《星桄伴我心》1月重磅嘉賓：
即睇：龔慈恩激罕剖白2次離婚傷痕：「我冇恨之入骨！」│25歲女兒林愷鈴閨房私密│點評佘詩曼、黃宗澤、王敏奕
即睇：羅泳嫻因舊愛吳啟華遭攻擊│德國前夫被色誘情刧│女鬼闖入屋求助
立即追蹤《東周刊》全新WhatsApp頻道，緊貼全城熱話、突發猛料、獨家消息！
最Hit
