發佈時間：17:04 2025-12-18
女星伍詠薇（伍姑娘）日前突襲維園工展會，為其代言的馬百良健康產品擔任一日店長。伍詠薇一現身即吸引大批市民圍觀，吸客度爆燈，紛紛爭相跟伍詠薇自拍合照及攞簽名，令現場如粉絲見面會！伍詠薇笑說：「今日嚟嘅朋友都好熱情，賣咗好多貨好開心，大家都好肯使錢！」
做店長谷爆銷情
伍詠薇自言十分滿意一手打造的銷售額，更說想不到首位客人是男士：「佢哋講得啱，就嚟聖誕要諗送咩畀朋友，送健康產品係好選擇，自己健康都想啲老Best健康！」笑言自己「Old school」的她，預備聖誕禮物外，更會親筆寫聖誕咭。
「係咪好Old School？我覺得人與人之間，多咗好多電話、Send個message講Happy New Year或者Merry Christmas就算，我啱啱收到喺柏斯嘅二哥寄畀我嘅聖誕咭，好窩心！」伍詠薇說。
向來型到裂的伍詠薇，竟然現身工展會，她說的確有很多人都說想不到：「我平時係宅女，好多人以為我唔會行工展會，其實我最喜歡嚟呢到買嘢，我有好多朋友都做產品，所以有好多老闆朋友喺度。我呢啲小婦人嚟到就『喂老闆，我嚟撐吓你！』跟住大家又畀好多產品我。最高紀錄嚟足四年，有兩年仲要借人哋鋪頭啲大車仔，拖咗兩車戰利品返去！」
專唱「失」戀歌
想當年伍詠薇的一曲《失落於巴黎鐵塔下》堪稱經典，最近網上瘋傳30年前她在香《十大中文金曲頒獎禮》奪新人獎銀獎的片段，成為全城熱話。伍詠薇說：「唔怪得呢排啲朋友係咁話我攞獎啦，95、96年嗰段片嘛，我首《失落於巴黎鐵塔下》呀嘛，我有印象！我好開心大家仍然記得！」
「其實我同『失』呢個字好有緣，我有首《失落於巴黎鐵塔下》、又有草蜢嘅《失樂園》，我同『失』字好有緣，所以我有咩都係失而復得，哈！」她續說有留意魏浚笙Jeffrey的作品《失約巴黎》，說很有興趣與對方合唱。
伍詠薇再為《全民造星》擔任評判，她讚美參賽者水準不俗：「我係中段選（參賽者），未去到最後，但都會望吓電視，睇吓心水嗰一、兩個，我估今會Tip中（賽果）。」至於會否因此而挑起唱歌癮？她說現在依然熱血：「熱血唔分年齡，我都想同佢哋Jam吓歌，睇到佢哋愈嚟愈成熟，好Good。」
