發佈時間：10:00 2025-12-16
有「無綫鑽石王老五」外號的安德尊（大王），雖然向來感情生活低調，但2021年被卻本刊獨家拍得，與拍檔宋芝齡蹺手行街街。親密關係通天後，兩人鏡頭前後依然不避嫌地打情罵俏，故外界都視他們為一對，可是他們否認情侶關係。
不過，安德尊日前經好友林嘉華逼供下，終於認愛宋芝齡。可惜，男人同樣多變，轉頭在另一個活動上，他竟然一聽見宋芝齡三個字，便馬上落閘！當日的現埸，《東周刊》卻發現，有一名貌似高海寧的中女全程傍實大王；而事後，兩人還孖住一起離開轉場去密會。此外，據悉大王的身邊還有一個默默守護他20年的前助手Sophia（阿So）。三名紅顏知己團團轉，大王的艶福當真拍得住擁有三位女友的鄧兆尊。
言聽計從
現年64歲、外號「無綫鑽石王老五」的安德尊（大王），與《流行都市》的拍檔宋芝齡，於2021年被本刊獨家拍到，在新蒲崗蹺手行街表現親密，因而傳出緋聞。縱使兩人否認情侶關係，但卻如常在鏡頭前後打情罵俏、挨身挨勢，戀情疑幻疑真。
前年，大王舉行生日派對，宋芝齡也有到場祝賀，令大王開心得攬實她，並漏口風說︰「因為佢（宋芝齡）咁上下（年紀）喇，搵唔到，求其擸一件，我就俾佢擸咗過嚟。」之後，兩人為節目介紹拜堂結婚儀式，演繹時似模似樣，幾許亂真，並獲網民大讚「好襯」，深得外間受落和祝福。
事實上，兩人的關係非比尋常，無所不談，大王還對女方言聽計從。2022年，他們接受鄭裕玲主持的遊戲節目《樓價有得估》，大王自揭經中韓混血的宋芝齡介紹下，於韓國買入一座山作投資；接着，宋芝齡解釋：「喺韓國買山唔係好貴，如果政府收地整路，咁就發喇！」
門當戶對
儘管兩人年紀相差17年，但其實都幾門當戶對。投資有道的大王，不單止在元朗有地皮，亦有傳他在加拿大有物業收租。至於，宋芝齡則是圈中的「隱形富婆」，開韓文學校，搞移民及教育生意之餘，還殺入金融業專門「炒輪」，更被封為「輪后」，賺錢瓣數多多，家住半山豪宅。
兩人雖然有戀情火花，但卻裹足不前。有指，因為大王跟傳足多年緋聞的前助手、現已轉職做保險的Sophia（阿So），仍然秘密交往中。據悉，阿So自2005年起已出現在他的身邊，早年還經常遭撞到出雙入對，更試過被拍到肩並肩行街，過馬路時拖手仔，儼如熱戀中的情侶。早前，接受車淑梅主持的《舊日的足跡》訪問時，大王就罕有地談及這段情。當被問到跟他廿年、仍未嫁的阿So，是否一直在等他？他直說：「我希望佢係啦！總之你儲定人情！不過講真，我唔想結婚，因為適婚年齡已經過咗。」
上月，大王的好友林嘉華從加拿大回港，並上了他主持的《流行都市》分享近況。期間，林嘉華突然追問大王的戀情，稱如果對方擺酒，就算「蝕硬」都自掏腰包返港出席：「咁我要搵埋佢另一半問吓先，係邊個？」安德尊即笑謂︰「仲要問？佢走咗喇！」湊巧宋芝齡已經離開，林嘉華即搶着笑問：「佢哋有冇承認過？（安：講咋喎？）講就係喇，大王講嘅嘢就係真，佢自己承認咗喇！」事後，大王被指首度間接認愛。
笑聲不絕
然而，事隔兩周，大王現身灣仔的一個長者活動，當他一聽到傳媒提及宋芝齡三個字，即馬上落閘：「今日係品牌活動，唔好問呢啲。」而本刊就留意到，他的附近有一名貌似高海寧的中女在徘徊。這名「熟版高Ling」經常笑容滿臉，加上渾圓的幸福身形，令人感覺十分親切，屬於賢良淑德的類型。
待活動完結，大王立刻戴上口罩，刻意保持低調；而「熟版高Ling」就火速上前會合。接着，兩人肩並肩而行，一起走進停車場。沿途上，雙方有傾有講，男方還被女方𠱁得笑聲不絕。期間，大王脫掉活動上的橙色西裝，換上自己的黑色西裝，而「熟版高Ling」則小心翼翼地將橙色西裝拎在手上，窩心服侍周到。然後，大王駕車載着「熟版高Ling」往銅鑼灣的方向絕麈而去，相信他們是前往撐枱腳兼促膝長談。
日前，擁有3個女友，享齊人之福的鄧兆尊，自言跟大王相熟，並在他主持的網台節目中，提到大王認愛宋芝齡一事。鄧兆尊表示，根據他的記憶，大王身邊的伴侶並不是宋芝齡，又說：「大王性格同我一樣，係唔會結婚嘅人。」看來，64歲的大王仍然是一隻無腳的雀仔。
