發佈時間：13:10 2025-11-17
真正嘅友情，有錢都買唔到。問下自己，老best係咪由讀書時代識落嘅同學仔？車銀優、姜河那、金英光同姜泳錫，4個夾埋135歲，着起校服喺新片《世一旅行團》上演兄弟情，仲約埋首次去泰國旅行，諗住留下美好回憶，點知去旅行搞到出入拘留所當酒店，認真癲喪。
車銀優揀咗呢部戲作為當兵暫別作，佢喺預告片話：「我曾經以為自己係世界上最儍，直到我遇到真正嘅儍人。」儍人出沒注意，大家小心！
車銀優暫別作以為自己好搞笑
有「臉蛋天才」之稱嘅車銀優，今年7月入伍，搞到唔少粉絲喊濕幾包紙巾。《世一旅行團》係佢第一部擔正嘅電影，片中佢係4人幫嘅顏值擔當，由幾歲細路女，到80歲婆婆見到佢都嗒晒糖，眉開眼笑。但佢搭錯線，以為自己有做喜劇演員嘅天份。
3位死黨性格都kam kam地
車銀優另外3位死黨，性格都kam kam地。姜河那係完美主義者，目標做總統，韓善伙由小學開始就對佢一見鍾情，仲亂入4人幫嘅旅行。金英光就天真得有點過份，想將阿婆隻牛帶返屋企養。討厭讀書嘅姜泳錫，則練成擘大眼瞓覺上堂嘅技能，畢業後想出家。
話晒佢哋平均年齡都3字頭，着校服演超齡學生唔尷尬咩？姜河那話：「如果套戲有真正嘅高中生同框，觀眾應該會一秒出戲吧？真係唔好意思。可能大家未必發現到，我演10幾歲學生時有化妝，30幾歲時就冇，係為咗真實呈現打工仔捱騾仔個樣。」
車銀優當兵仍keep住曝光率
車銀優因為當兵，無奈缺席電影宣傳，不過佢一路keep住有曝光率。早前佢被發現以兵哥look，現身韓國慶州舉行嘅亞太經合組織（APEC）晚宴擔任主持，今個月底又會推出新專輯《ELSE》，弊在谷碟時引爆「關公災難」，超過10萬歌迷打電話去聽車銀優一早錄好嘅message，點知有人打錯號碼變成擾民，搞到事務所要道歉收場。
上映日期：11月13日
延伸內容：車銀優今正式入伍服兵役 昨開直播跟粉絲道別 稱平頭新髮型未適應
延伸內容：車銀優推出首部互動式VR演唱會電影 觀眾可邊睇邊揀情節結局
延伸內容：車銀優、李浚赫、秋英宇 韓劇男神愛狗暖男 一文睇清有多寵狗
《東周網》訪談系列節目《星桄伴我心》11月重磅嘉賓：
即睇：孫慧雪爆拍性感寫真因由 生仔大出血攞命搏 被懷疑是犯罪集團主腦
立即追蹤《東周刊》全新WhatsApp頻道，緊貼全城熱話、突發猛料、獨家消息！
