發佈時間：12:00 2025-10-25
年輕，就是本錢。31歲的鄭紫欣（Kobe），早前殺入內地節目《一飯封神》12強。她首輪闖關的圓形法式威靈頓牛柳，連評判謝霆鋒都食到舔舔脷。「化學系靚廚」這個代號，受之無愧。
不說不知，原來她沒有正式接受過廚藝訓練，但24歲那年，卻膽粗粗開法國餐廳。
「其實係越級挑戰，好唔近乎常理嘅一個選擇。因為我喺大學讀化學，咁嘅背景，唔係開cafe，而係餐廳，仲要法國菜，可想而知當時我幾衝動，冇諗過自己做唔到。」
有自信，也要有天份。Kobe遺傳了媽媽煮得一手好菜的DNA，開餐廳，也是代亡母完成旅程。
遇霆鋒知音
提起食，Kobe便眉飛色舞。早前播畢的《一飯封神》，雲集了五湖四海的出色廚師，包括她在內的84名「小廚」，要爭16張凳仔入圍，可想而知戰況激烈。
Kobe在首個回合，出動了招牌菜鵝潤腸法式威靈頓牛柳參戰，圓形威靈頓牛柳對比起長形，更能保持入口溫度。幸運地，遇上識貨的評判謝霆鋒。
「當時我十分驚喜，因為好多人都唔清楚威靈頓牛柳係一個點樣嘅菜式，但係霆鋒老師喺我開口講解之前，已經睇到晒啲嘢，講到俾我聽，我覺得：『咦！我真係遇到知音人，佢係專家。』」
第一次近距離見到偶像，她坦言心跳加速。對於外界批評謝霆鋒用手背試食作狀，她代為平反，「其實手背試食好常見，嗰時我啱啱炒完蘑菇肉，驚焫親佢，佢仲話：『冇事，你擺落嚟。』我好鍾意睇佢做戲㗎！好似《新古惑仔之少年激鬥篇》，仲食咗佢同連鎖店crossover嘅漢堡包，好好食。」
她一路過關斬將，殺到第4關就出局。回想起來，她覺得第2關盲盒挑戰最困難。
「冇諗過一打開個箱，抽中咗廣西北部灣沙蟲做食材。我做法國菜㗎嘛，點算呢？啲蟲郁下郁下，我超級驚，當場嗌咗出來。啲中廚走埋嚟話正，西廚就話我大鑊。冇辦法啦，抽到就要努力同啲蟲做朋友。」
最後，她12強止步，自問和各大高手過招，成績已超額完成，「簡直喜出望外，難得又識到咁多廚師。」
匿雪房喊醒
Kobe受到廚神媽媽的影響，小時候已喜歡食和煮，「大個點解要讀化學？因為我鍾意；點解畢業後轉做廚師？亦因為我鍾意。做廚師好難，但我覺得困難唔係一個令我停步嘅原因，只要我好鍾意、有目標，就會用盡所有辦法去闖過難關。」
大學未畢業，她在教授的鼓勵下，計過度過，覺得與其花錢和時間去修讀藍帶等廚藝課程，倒不如直接入行，看自己是否適合。她先跑去酒店廚房執頭執尾做兼職，畢業後就轉做全職，前後做足兩年。
一個大學生，又是女仔，走入男性主導的廚房，可以想像一定會被撥冷水。
「入廚房第一日，所有師傅都話：『你呢個𡃁妹，shiny new toy，玩幾日就走㗎啦！女仔唔好做呢行，又被油彈、被個爐焫。』﹙有冇被粗口鬧？﹚一定有，好平常，鬧到喊咪匿入雪房，凍一凍就醒。呢個係文化傳統，𠵱家啲師傅溫和咗，驚啲人劈炮，以前嬲起上嚟，真係『飛碟』㗎！咁你先會驚，唔再犯錯。」
學了廚房基本的運作流程後，心口掛個「勇」字的她，2018年決定自立門戶實戰，在西營盤開設法國德國農村菜餐廳Off Town Kitchen。
「屋企人本來預咗嚿錢俾我去留學或讀廚藝學院，我話不如直接俾我開舖，起碼學到煮嘢之餘，仲營運緊一門生意。如果做得好，係有嘢返。」
睇平台學廚
解決到開店的資金，另一個最現實的問題是：究竟Kobe師從哪位師傅，有信心做廚師搵食？
她笑說：「我主要靠自學，上平台MasterClass睇名廚Thomas Keller嘅教學，同埋會聽客人嘅意見，一路改進。講真，開餐廳唔同喺酒店打工，要攬晒所有嘢上身，可見當時我幾想做呢件事，先會越級打大佬。」
打大佬之餘，間中要應付麻煩客人才頭痛。試過有客人批評Kobe炮製的香腸酸菜腌肉拼盤，跟他在法國吃過的有出入。雙方爭拗一輪，最後她免去客人整張帳單，才平息事件。
雖然餐廳生意已上軌道，但月前她選擇關門大吉，問她原因？她說：「主要係租約期滿，同埋回顧過去7年，我幾乎日日喺舖頭，冇去旅行，見唔到屋企人、朋友，生活好神奇。咁我就諗開餐廳係我其中一個夢想，做咗喇，下一步人生想要乜呢？我想跳出框框，困得太耐。」
她指爸爸非常贊成結業決定，「佢之前唔反對我開餐廳，係因為知我要試過先死心，冇諗過我會做咁耐。」
Kobe現時主力做廚師到會，與餐廳或廚師合作推出餐單，又會接幕前工作。忙碌形式有別以往，但她開心見到客人滿足的笑容，這份美食帶來的「甜」，始終如一。
延伸內容：最酷星二代逐個睇︱李克勤謝霆鋒張智霖李嘉欣之子暴風式成長 顏值不遜父母 令人眼前一亮
《東周網》訪談系列節目《星桄伴我心》10月重磅嘉賓：
即睇：湯令山失戀情歌點擊破1500萬 坦認喊住唱 揭Wyman教做人智慧 爆生得唔高謎團 曾擔心生計做某件事
即睇：鍾鎮濤與范姜「姜濤戀」有火花對談 拍《巨塔之后》床上戲心得
立即追蹤《東周刊》全新WhatsApp頻道，緊貼全城熱話、突發猛料、獨家消息！
