發佈時間：20:05 2025-10-23
劉俊謙同蔡思韵因合演《幻愛》而開花結果，令人相信愛情，下一對會唔會係拍《愛．憾事》（Regretting You）而撻着嘅瑪森泰晤士（Mason Thames）同麥根娜姬絲（Mckenna Grace）？電影中，兩人情竇初開，偏偏麥根娜有個虎媽艾莉遜威廉絲（Allison Williams）出手阻止，仲要撞正佢爸爸同阿姨死於一場車禍，揭發出一段複雜關係，傷了幾個心。其實感情呃唔到人，學家英哥話齋：「你愛就要講！」總好過唔出聲造成錯配，一世遺憾。
電影改編小說
大家冇估錯，《愛．憾事》又係改編自小說，原著作者柯琳胡佛（Colleen Hoover）上一部作品，正是《痛愛完成式》（It Ends with Us）。佢話：「呢部係一部關於理解同寬恕嘅電影，係講一對母女努力從難以想像嘅喪親慘劇中走出來嘅故事。佢哋喺生活上好多睇法都唔同，經常意見不合。」
男女主角戲假情真
童星出身嘅麥根娜，今年19歲，喺《Marvel隊長》中演過童年版Brie Larson；而18歲嘅瑪森，正是真人版《馴龍記》嘅思噎仔。早排兩人不時被影到孖公仔行街，到《愛．憾事》去到德國柏林宣傳，佢哋索性用行動將戀情浮面。提到角色「卡娜」，跳過試鏡階段、直接獲邀演出嘅麥根娜話：「佢係我從影以來最成熟嘅角色，我終於大個女了。」瑪森就話：「記得帶紙巾入場，因為大家會好似坐緊情感過山車。」
感情早有暗湧
大人方面嘅感情線，分別由艾莉遜、奇連伊士活兒子史葛伊士活（Scott Eastwood）、占士法蘭高嘅細佬戴夫法蘭高（Dave Franco）同維拉費哲蘿 （Willa Fitzgerald）孭飛。兩姊妹及一對好兄弟，表面係兩對幸福愛侶，實則感情早有暗湧。維拉話：「如果再做選擇，會點呢？呢個諗法永遠引人入勝。其實如果片中每個人都早啲對自己誠實，結果會好得多。」
上映日期：10月23日
