發佈時間：15:27 2025-08-15
有「美魔女」美譽的楊玉梅，除了勤練瑜伽之外，飲食方面更是時刻節制。此外，她還每星期都找中醫調理，近日卻因相關事而悶悶不樂。事緣，她看慣的中醫突然退休，於是要求中醫診所退還預繳的6千元診金，但卻被拒。其實，這事件對她來說，金錢是小、原則是大！
日前，怒氣沖沖的楊玉梅，踩上位於尖沙咀的中醫診所問過究竟。當她入到店內找負責人時，前來接待的，竟然是之前拒絕退還款項的職員。接着，兩人走進房間傾談了半小時；不過，對方依然企硬，堅持不會退款，導致楊玉梅在餐廳突然眼濕濕，「美魔女」頓變委屈女，我見猶憐！
畀郭富城整蠱
1990年，楊玉梅參選亞姐，不單止勇奪季軍，還獲得「最上鏡小姐」及「完美體態」。當年獲得亞視力捧的她，未學過演戲，已火速被安排入劇組，擔當女主角，跟湯鎮業合演古裝劇《劍神不敗》。完約後，她轉戰影壇，之後簽約無綫，她憶說：「有一次同郭富城合作劇集《廉政行動組》，佢真係好靚仔又幽默。拍劇時，佢叫我唔好着高踭鞋，我當然明白啦！嗰時我哋經常捱夜，但佢仍然精力充沛。有一幕講我扭傷腳，佢替我除鞋捽腳時，仲整蠱我，拍我近鏡時，佢猛撩我腳板底呀。」
圈中隱形富婆
直至2000年，楊玉梅選擇離開娛樂圈，因她覺得這行食無定時，又沒有足夠休息時間，身心勞累，還經常要拖着行李篋四處開工，她表示：「我心諗，我當時卅幾歲，人生點解要咁辛苦？雖然賺到錢，但好似冇平安，我想趁年青發展唔同範疇。」進軍飲食業的她，成功轉營，旗下餐廳於高峰時期達24間，亦曾涉足美容界，百足咁多爪，難怪她一度被稱「隱形富婆」。可惜，一個世紀疫情將她的飲食王國完全摧毀。
60歲凍齡有術
在商場長袖善舞的楊玉梅，更懂得養生！現年60歲的她，凍齡有術，樣貌和身材與選美時並無兩樣。原來，十多年前她已經開始學習瑜伽，年前還考獲瑜伽導師牌。另外，她還修讀體重和營養管理的課程，她更獲得全班第一的佳績，所以多年來體重不超過100磅，她分享說：「為咗唔使化妝，我鍾意曬太陽，有健康嘅膚色，睇起嚟更後生；另外，我好鍾意瞓覺、唔食辣、唔食煙、唔飲酒，鍾意飲紅豆水，因為紅豆好養生，食多啲對女人好好。」
要求退錢不果
為了可以由內靚到外，楊玉梅更會定期找中醫針灸及食中藥調理，所以她光顧一間位於尖沙咀的中醫診所，並且參加預繳診金的計劃。不過，近日她看慣的中醫突然退休，於是她要求該中醫診所退還預繳的診金：「我都已經上咗去好多次追討，其實都只不過係6千蚊 ，我一直喺佢哋公司睇開一個叫蘇醫師，我買完一個course，再開多另一個course，喺佢哋嗰度都用咗幾萬蚊。其實出邊有好多公司贊助我，我都唔去，因為睇中醫係需要夾自己嘅身體狀況。我睇咗蘇醫師咁耐，好明顯面色有好轉，呢個醫生好夾我，但係最近佢因為退休，所以就冇做。」
她續說：「咁我就要求呢間中醫診所退錢俾我，佢哋堅持話仲有好幾個中醫，嗰啲錢可以用嚟睇其他中醫，但係我真係接受唔到，因為中醫係唔可以話改就改，我𠵱家只係要求佢哋退番啲錢俾我啫，啲錢係我㗎！」
親搵負責人理論
日前，本刊陪同怒氣沖沖的楊玉梅，一起前往該中醫診所。甫進店內，她馬上找負責人，而前來商討的女士，正是之前拒絕退款的職員。楊玉梅生氣的說：「我上咗嚟咁多次，都係同你傾，我打電話嚟已經講咗要見一個話得事嘅人。」接着，兩人走進房間傾談約半小時，該名職員依然企硬，更指自己已經問過消費者委員會不用退款：「你用番呢6千蚊睇我哋其他中醫，我哋唔係冇其他中醫俾你睇，所以唔可以退錢俾你。其實，我哋啲中醫，全部都係開嗰啲藥，唔會有分別嘅。」
考慮報《東張》？
聽到之後，楊玉梅一臉茫然並非常驚訝的說：「你意思係所有中醫都係開嗰啲藥？唔係根據客人嘅體質？」該名職員依然堅稱不會退款，得知這個結果後，她十分無奈，並向本刊表示：「其實數目唔多，啲錢係事小，但係原則事大，𠵱家佢唔退俾我，即係欺壓我！我冇理由俾人咁樣蝦，而完全唔反抗。個結果真係好有問題，我真金白銀攞出嚟，佢俾唔到我要嘅服務我，點解冇得退錢？」最後，她非常落寞地走到附近的一間餐廳，飲番杯咖啡靜一靜；期間，她望着電話，一臉情緒低落兼愁眉苦臉，極度不開心。下一步會唔會報《東張》呢？
從法律途徑追討
對於多次未能成功向中醫診所取回6,000元的預繳診金，楊玉梅表示不會放棄，會繼續據理力爭。不過，公說公有理，婆說婆有理，如果在合約上沒有寫明相關的條款，到底她在法理上有沒有追討的權利呢？
資深大律師謝偉俊表示：「即使沒有正式書面或口頭協議，也視乎對方（包括中醫及中醫診所）有否任何言、行導致苦主信賴兩者有合作及互相承擔權責關係。」或許楊玉梅可嘗試從法律途徑討回公道。
延伸內容：幫朋友店舖新貨影宣傳照 楊玉梅3粒鐘換40套衫做生招牌
延伸內容：郵輪遇娛圈「魔爪」 楊玉梅開P掃走陰霾
《東周網》訪談系列節目《星桄伴我心》8月重磅嘉賓：
即睇：譚輝智親解拉姑寵愛之謎 爆喊陪最愛開刀「望住手術室盞燈，我真係好驚！」
