發佈時間：10:00 2025-08-10
曾經在樂壇風光一時、效力TVB22年、今年51歲的的李忠希，於5年前離巢另謀高就；而在女兒的鼓勵下，他開了一間啪骨店。在圈內人緣甚好的他，獲得不少藝人光顧，所以在行內迅速打響名堂，成為「啪骨高手」，可謂《中年好翻身》的真人版。日前，本刊在大角咀發現向來喜歡健身、踢波的徐榮正在操拳。原來，他與李忠希是在訓練班的同學，多年來親如兄弟，幾乎隔日就見面；而他在這裏練拳，全因為好兄弟在樓上開設啪骨店，隨時可以幫自己鬆一鬆。
風光一時
90年代在表哥、太極樂隊成員唐奕聰的引薦下，李忠希成功入行做歌手。1996年，他憑住《太著緊》專輯奪得「叱咤樂壇生力軍男歌手」銅獎，當年的金獎及銀獎分別是鄭中基和陳奕迅。最風光時，他以百萬名車代步，成為一時佳話，可惜因翻版唱片肆虐，令他在樂壇止步。1999年，李忠希入讀第13期藝員訓練班，同班同學包括：林峯、楊怡、徐榮等。除拍劇外，他還做過《全線大搜查》、《東張西望》等，並為自己鋪定後路，開過酒吧、火鍋店、時裝店，也曾做過保險經紀。
2019年，李忠希發現身形消瘦和腳震，原來是甲亢指數偏高，被迫要停下來休息，2020年更離巢TVB。他憶述當年因為去玩，而認識了郭富城的排舞師Sunny Wong，於是一起搞生意，他笑說：「我哋喺蘭桂坊開咗間club，第一批搞clubbing，開張時陳慧琳、郭富城、Cookies、側田都來，Cable TV仲直播，幾誇張！當然好生意，做咗兩年，飲得好厲害，老婆勸我：『唔好飲咁多酒，身體要緊。』我仲反駁佢：『唔飲酒，唔使做生意呀？』𠵱家我唔能夠飲嘞。」飲酒、夜蒲，俱往矣，他坦言要留番條命養妻活兒。
除演藝工作外，李忠希還一直有從事保險的工作；不過，5年前的疫症，令他決定放棄。他無奈的說：「我做咗保險都有12年，疫症令生意真係麻麻；老婆本來係做空姐，但之後港龍又執笠；阿女當時要考呈分試，咁老婆就索性唔做嘢，專心處理阿女嘅學業。」幸好，他一直有儲錢習慣，好天斬埋落雨柴，所以近年經濟未有太大壓力。
一言驚醒
疫情時，因為多了時間在家，李忠希於是經常在家裏看社交網，期間發現一個在馬來西亞的啪骨奇人，他憶說：「當其時我日睇夜睇，成日個口噏噏，如果我都可以咁樣幫人就好啦！有一日女兒同我講：『爸爸，你成日叫我學嘢，既然你咁鍾意睇呢個叔叔啪骨，點解你唔去學？』一言驚醒夢中人，我於是毛遂自薦send e-mail去做學徒。初時佢見到我，仲以為我係《東張西望》放蛇。」
李忠希續說：「由學師仔做起，企喺旁邊睇師傅點樣做，學到幾多得幾多，用咗7個月左右考到一張證書。」跟這個師傅學完後，好學不倦的他，再跟另一個中醫整脊師學了兩個課程。3年前，他在老友黎澤恩（Ronnie）的健身室內，開了第一間工作室。由於他在圈中人脈甚廣，故不乏明星客仔，2022年已擁有自己的店舖；而月前再擴充營業，由荔枝角的小店搬到大角咀一間拳館的樓上，老婆做前台，他自己既做「啪骨」又兼顧公關，夫妻同心，其利斷金！
日前，下午3時許，本刊在大角咀福澤街的一間拳館，發現正在練拳的徐榮。雖然他今年已經51歲，但因為經常踢波及打拳，操得一副鋼鐵身形。當日如常操練的他，拳拳有力，期間他突然好似整親，周身唔舒服，成個人謝晒！好兄弟李忠希收到拳館職員通知後，就立即跑下來幫他治理。只用了5分鐘時間，李忠希就已經令徐榮舒筋活樂；而變番生龍活虎的徐榮，忽然追住好兄弟玩，兩人你追我逐，加埋過百歲人，仍似足大細路。
《東周網》訪談系列節目《星桄伴我心》8月重磅嘉賓：
即睇：譚輝智親解拉姑寵愛之謎 爆喊陪最愛開刀「望住手術室盞燈，我真係好驚！」
