發佈時間：12:00 2025-07-22
早前，90年代著名諧星八両金（葉競生），遭前妻八両菜（何顓彤）在本刊的訪問中連環控訴，除了指他家暴、出軌、食軟飯、刻薄之外，更驚爆他患癌「得番幾個月命」。日前 ，今年71歲的八両金，為此特地從廣州返港，帶同30歲的兒子八両仔（葉小霆）現身闢謠。現場所見，穿着白色緊身T恤的八両金勁精神，當記者提出希望他展示身體狀況時，他二話不說就拉起上衣，露出紮實的身形，以及手臂的肌肉依然緊緻有力。此外，他又即場表演在椅上做掌上壓，力證自己沒有患癌。
修佛唸經
當日，精神奕奕的八両金在記者面前拉起上衣，大晒結實身形和緊緻有力的手臂肌肉，完全不像已「奔七」。他幽默地的說：「我冇肚腩，所以做唔到老細！」隨即又展示拳擊動作，只見他出拳迅猛，乾淨利落。意猶未盡的他，又走到兩張椅子的中間做掌上壓，在短短10秒內，他輕鬆完成6下，並且面不改容，還能夠流利對答，鐵證自己健康無恙。面對前妻指控患癌「得番幾個月命」，八両金帶點不滿的說：「每個人傷風感冒都會有水腫啦！話我有癌症？你睇我𠵱家似咩？我唔係講嘢都講唔到嘅病貓，講嘢仲好大聲，大家眼見我狀態為證。」他強調，流言蜚語令他好煩、好困擾、好傷心：「唔好打亂我嘅生活，我𠵱家早上修佛唸經，中午帶埋囝囝去見客，我同個仔生活正常。」記者追問有冇做body check？他笑言：「因為冇做開，唔知乜叫body check，我起身就蹦蹦跳，暫時未有咁嘅需要。」問他有否「3高」？他突然搞爛gag：「我人生（得）好矮，冇高過！」接着自己哈哈大笑。不過，八両金就承認年多前身體的確有異常：「嗰時咳咗幾個月唔好，覺得自己係『百日咳』，囝
囝認為冇可能，覺得我有肺氣腫，建議不如去睇醫生做身體檢查，後來照完肺冇事，身體非常好，只係新冠後遺症加肺氣腫所致，食藥後已康復。」八両仔斥媽咪未搞清楚件事，不應該外向亂講。對於2023年與前妻復合一事，八両金解釋只是讓經濟有困難的她，暫住在自己的家中，純粹朋友式幫忙：「俾鎖匙佢係念舊情，但絕對冇同床！冇任何夫妻之實。」他透露10多年前的確曾盼復合，但並非有渴求女人的需要，而是想給兒子完整的家庭：「多年來，我一直送上關心，我要做嘅嘢都做咗喇，但佢唔願意就算。我話你聽呀，個仔湊大咗喇，我經已冇咁嘅（性）需要，𠵱家我學佛嘅，天天唸經。」
放下恩怨
八両金強調，在他的心裏面堅持要一夫一妻行到尾，不會三妻四妾：「呢個（女人）冇咗，代表今世姻緣就結束，我唔想有第二個，唔好有咁複雜關係，令個仔痛苦成長。」問到還愛不愛八両菜？他認為來者都是緣，但可笑的是，不知上天安排的是姻緣還是仇怨？不過，如今學佛的他，已學會放下恩怨，並且將每個對自己不利的人看成菩薩：「就算被呃、被鬧，佢哋從中會教到自己修行，今次明白到口孽好可怕，唔好犯口孽。」
有關指控八両金家暴，兒子八両仔就站出來為父親辯護：「從細到大都冇見過爹哋打媽媽，爹哋本質係個好人，一直行善積德捐錢助養孤兒，只係有啲脾氣，自小由佢照顧我飲食，小時候幫我沖涼，帶住我成長，我反而對媽媽印象唔太深刻。」八両金也承認，曾因管教兒子「拍打」過他：「我成日同個仔講：『大人嘅事唔好理，始終得一個生母，將來有需要時要供養佢。』」
97年金融風暴輸身家
其實，八両金對前妻的指控完全不想回應：「只能講句，佢所講嘅嘢，出面知者、見者，自有公道評論，所有嘅言論天知、地知，最後是與非，由天主宰，幸而所有fans及朋友都知道我嘅為人送上關心，留言好正能量，唔使多解釋。唔識我嘅人，就算多解釋都冇鬼用，只會花自己嘅氣力。」這趟指控後，八両金直言對前妻已心死：「證明大家到咗盡頭，打後我哋各自為政，佢還佢、我還我，既然佢唔受我關心，祝佢生活愉快、身體健康！」
談到經濟狀況，八両金憶述97年金融風暴是他人生最大的轉折點：「當年，我有10幾層樓，幾間商舖，仲有大量足金嘅金條同金器。如果留到𠵱家，市值起碼幾個億，但已成過去，佛家所言：『本來無一物』、『色即是空』。」當日，他戴上兩條粗手鍊及大大隻金戒指，問到還有否留起8両金？他直說以前愛好足金，因為男人的金就好似女人的化妝品：「既然自己唔靚仔，就靠戴金飾裝身，增加對女性嘅吸引力，所以當年不停買金飾，甚至珍藏多套金幣，𠵱家賣走大部分，最重要冇欠人債，咁就安安樂樂。」
八両金透露，現時主要經營自家品牌的洗髮水、沐浴露，近年更進軍電商生意：「公司𠵱家搬咗去廣州，養活我同個仔完全冇問題。」他更嚴正澄清，97年時身家已清零，所以前妻並無夾帶私逃，作為男人大丈夫要有擔當，講出這個事實真相，良心才過意得去。在旁的八両仔就表示，父親的確曾想家庭大團圓結局，但他卻有自己的想法：「俾我揀，寧願兩父子相依為命算喇，但我支持爹哋搵個老伴，照顧佢後半生，唔好咁孤獨。」八両金就笑言：「我反而希望囝囝快啲結婚生仔，我湊孫就唔會寂寞。」可是，八両仔卻推說：「呢個講緣份，𠵱家未搵到。」
大談性需要
問到七旬的八両金可有男人的性需要？他說：「講真，有時我都會諗呢樣嘢嘅，哈⋯⋯但係呢諗諗吓，諗到小時開始剃度嘅和尚，我就學佢哋食吓齋、唸吓經，太寂寞咪馬上返香港搵朋友，男女朋友都可以，呢啲都係寄託，而唔係要啲乜。」他亦承認多年來都有女人示愛：「反而係自己有介意，都係堅持一夫一妻。」問到有多少個女人投懷？他突然露出怕醜的笑容說：「唔講喇，親情最重要，希望抱孫。」看來，八両金極度希望升呢「八両爺」，咁八両仔就要努力啲𠶜！
