發佈時間：16:11 2025-07-14
雷霆 881 商業一台將於今個夏天推出一系列全新暑期節目，7 月 20 日起逢星期日中午 12 時30 分至下午 6 時,為聽眾帶來嶄新聲音體驗。由殿堂級聲演陣容打造的原創廣播劇《我所聽見的未來》打頭陣。《我所聽見的未來》由石修(修哥)、陳志雲(Stephen)、馮素波(波姐)、黃文慧(Bonnie)及梅小惠五位殿堂級藝人首度攜手聲演,並邀得「祥師兄」阮兆祥及新生代人氣歌手 Yan Ting 周殷廷及黃妍驚喜客串。
石修首度聲演廣播劇 貼地對白演繹中二角色
石修於劇中聲演一位懷才不遇的歌手「夏守正」，對「成功」二字有着難以釋懷的執着，角色帶有濃厚的「中二氣質」。首度聲演廣播劇的修哥表示：「好新鮮！今次係我第一次參演廣播劇，以前做電視劇、拍戲,係連埋動作同所有鏡頭一齊去做，今次唔需要照顧其他嘢，用把聲去講就得。錄完之後好似去咗一個新嘅家庭,因為大家都住喺同一間屋，喺裡面發生好多事。有時因為啲對白寫得好好，好貼地、好現代，我喺呢個廣播劇裡面都吸收到好多好新嘅現代年輕人講嘅說話,我一路工作一路學習。」
陳志雲挑戰風流角色 科幻題材預知未來世界
陳志雲今次突破以往形象，挑戰風流、吊兒郎當又充滿壓抑的角色，聲演一位表面灑脫、實則空虛、幽默中帶點蒼涼的編劇「司徒文泰」。 Stephen 笑言:「廣播劇而家真係好少做，咁認真而且仲有咁多老戲骨、資深嘅演藝界朋友嚟做係好難得。今次最精彩嘅係有好多你估唔到嘅未來元素，但諗深一層又可能真係有一日就出現喺你門口。我哋會用好多科幻效果，令大家能夠感受到我哋喺未來世界可以點樣獨處，亦有顯示到銀髮經濟喺未來可以點樣做。錄音過程嘅趣事直程可以拍另外一部劇出嚟，我哋唔係淨係做廣播劇咁簡單㗎！一有少少空間嘅時候，犀利啦！波姐又唱粵曲，我又唱，個個都有份玩。」
馮素波事隔 50 年再聲演 重拾兒時點滴
馮素波一向擅長演繹慈母與嫲嫲的角色，今次聲演的「李心悅」，是一位身體虛弱、依賴高科技照顧的長者角色。她外表溫和，但笑容背後卻藏着「不能說的名字」。波姐表示：「錄音過程最得意係 Stephen 竟然唱子喉、唱粵曲,然後修哥又唱吓時代曲。參與今次廣播劇畀我好多回憶，因為我十幾歲嘅時候，爸爸都有搞廣播劇，我仲係細路聲，但已經演少女角色。今次我哋成班都係長者，五個人係同屋共主，講出我哋長者一齊生活嗰種樂趣。好開心畀我可以隔咗五十幾年都可以去做廣播劇,希望聽眾們接受我哋嘅演出，畀多啲好評，等我哋更加能夠改善、改好啲，最希望係可以繼續畀我哋播落去。」
