發佈時間：11:24 2025-06-20
昨日(6月19日)《女神配對計劃》舉行宣傳活動，一眾女神和參賽者齊齊出席活動玩遊戲，而葉蒨文與曾展望這對「愛回家CP」在活動上有緣地被選中互動，曾展望更可以公主抱女神，站在身後的兩位參賽者就搞笑地冇眼睇，和笑着叫曾展望要小心啲，小心啲整親，打唔到網球。
葉蒨文坦言食飯環節好「地獄」
之後葉蒨文與曾展望一同接受訪問，葉蒨文就坦言食飯環節好「地獄」，因為當時自己看不到原來三個男仔背後有咁大嘅火藥味，而問到她食飯時是否只看着曾展望？她笑言：「當然唔係啦，我全部都有望，因為我都好擔心身為素人的男參加者，佢哋真係未演過戲，相信佢哋都會有好大壓力，我都好尊重佢哋，所以都會用心去了解佢哋同佢哋相處。」而問她現實生活中，是否經常被幾個男人力追，她坦言有試過，但未出現過一齊食飯這個場面。
逐個點評3個求愛勇者
另外，談到觀眾已為葉蒨文選好曾展望為對象，更早已為二人的子女改名。葉蒨文就話愛情是持久戰，節目中的5個女神都好認真，不會欺騙感情亦不想傷害到人，所以一定會用心去了解每一個人。葉蒨文表示3位求愛勇者都各有優點各有好處，3位性格大有不同。葉蒨文就認為林澤謙（Him）是一個好識講嘢，好溫柔同好識溝通嘅人，情緒好穩定，所以作為伴侶的話，會覺得他可以畀到好多情緒價值個女仔；林堡熙 （Eddie）是一個好專一，好有深度同思考嘅男仔， 他會默默地在另一半背後付出， 幫你頂住嘅勇士 ；GM好似一個青梅竹馬嘅朋友， 同他一齊闖天下經歷開心傷心，所以在她的眼中3個都好唔同風格，可以讓她探索到不同的戀愛觀。
為林堡熙 （Eddie）平反
至於林堡熙 （Eddie）被外界起底為戀愛常客，問到葉蒨文會否覺得對方花心和為了曝光率而參加節目，葉蒨文為林堡熙平反，力撐他是一個好真的人：「我相信自己眼睛同個心， 我同佢交流傾咗好多偈， 我覺得佢係好真嘅人 ，我睇到佢係好有誠意認識我， 佢睇咗我好多我以前嘅訪問 ，知道我內心世界 ，呢啲係冇得呃。」她續說：「佢內心世界好豐富 ，佢有少少傲氣而唔係自大，好有自己一套嘅想法，我同佢有好深度交流 ，佢唔係只係識吃喝玩樂，暫時我都好信任佢。」
