發佈時間：14:59 2025-06-03
今年94歲的資深藝人黃夏蕙一生傳奇，年輕時因搭上富豪律師胡百全而風光無限，曾坐擁豪宅、名車，過着闊太般的生活，她更為男方誕下6名子女。
然而，隨着胡百全的離世，失去大水喉的黃夏蕙，近年生活可謂翻天覆地。《東周刊》獨家直擊，她由天堂跌落凡間，入住在「大西北」、只有160呎的過渡性房屋，過着基層人士的生活，她還自爆靠長生津過活：「馬死落地行，有個『瓦遮頭』已感恩。」
黃夏蕙背後隱藏着坎坷人生
有一個可愛外號「夏蕙BB」的黃夏蕙，背後卻隱藏着一段坎坷的故事。年輕時，黃夏蕙與富豪律師胡百全相戀，雖然無名份，但獲對方寵愛，她還為對方誕下6名子女。她表示，當年不計司機及7名家傭，每月獲贈共30萬元的巨額生活費，住過跑馬地及中半山豪宅，過着闊太般的生活。
可惜，自胡百全2008年離世後，她便失去經濟支柱，生活開始變得困難，她憶述：「當年缺錢，冇能力長期作戰打官司，損友見我等錢使，更乘機騙走咗我嘅匡湖居業權，丟晒我啲家當，搞到我無家可歸，試過要瞓骨場，好彩有朋友收留，多年嚟只能寄人籬下，寄居朋友屋企。」
現時，窮到燶的黃夏蕙，只能靠每個月4,195元的長者生活津貼過活。因為眼見「棺材本」只剩下不足1萬元，所以她月前決定申請法援，向胡百全先父胡禧堂的遺產信託基金追討金錢。黃夏蕙曾表示，胡百全與她於1980年訂立契約，容許她從胡禧堂遺下的基金收取利息；另外，她的6名兒女在日後亦可以分得胡家的家產。不過，最後法援以黃夏蕙非胡禧堂基金的受益人，加上承諾契約的追討期已過，故不受理。
等足５年 入住新田過渡性房屋
之前，黃夏蕙聲稱正在籌備電影《夏蕙傳》，還覓得陳建興（Philip）飾演她伴侶潘炳烈的中年版。日前，她便在Philip的陪同下，親自到金鐘法律援助署上訴：「法援搞咗幾個月最後唔受理，多少都會影響到心情。好彩有番一個『有瓦遮頭』嘅地方，唔使再寄居人籬下當贏，算係老懷安慰喇！」
上訴完，黃夏蕙便返回新田過渡性房屋區交租。《東周刊》就乘機直擊她的組裝合成新居，屋內十分新淨，光線充足，裝有冷氣及煮食的設施，還提供雪櫃，而她則自備雙人梳化床、被鋪、飯煲及一張電動麻雀枱。她表示這張枱由朋友送贈，想她多打牌訓練腦筋，亦能當飯桌。她對這個新蝸居感到滿意：「原先要求市區單位，但暫時編配唔到，咁有個竇都算係好彩啦！只求有張床及配備wi-fi通到電話，同埋獨居老人要有平安鐘嘅救生裝備。」她更強調經過資產審查，證實她的確係窮到完全符合申請資格，並且等足5年。
黃夏蕙同「影后」李菁擁有開篷Benz
提到往日的輝煌，Philip爆當年香港只得兩架開篷Benz，分別由黃夏蕙和「影后」李菁擁有，她不禁感慨：「以前我冇在乎啲錢，日日豪使，60年代帶雛鳳鳴劇團70人去美國巡演，每晚喺明星食堂包起一席，請青山、姚蘇蓉、鳳凰女、鄧碧雲、梁醒波、新馬仔及祥嫂食鮑魚，連乞兒都會打賞100蚊。雖然𠵱家落難，但從來冇向朋友講出狀況，長貧難顧，我唔想影響到人哋，同埋人哋唔會幫你，請人食飯就好哋哋，佢哋遠遠都會過嚟，但好多次叫番人哋請食飯，就會答『唔得閒』，呢啲係人性。」
不靠子女 不同潘Sir移居美國
問到為何不向子女及伴侶潘炳烈求助？黃夏蕙堅拒的說：「我有飯食唔使細路養，佢哋以為我仲係好風光。潘Sir移居美國多年，大家各自有唔同生活，香港屬於我嘛，𠵱家變咗佢有佢，我有我，我唔會同佢攞錢。」不過，視錢銀如身外物的她，堅持對朋友不呃不借，也不會計較出騷的酬金，逢請必到，所以得到朋友的尊重。
當問到慣不慣入住平民房屋？黃夏蕙突然百感交集感的說：「一定係淒涼啦，呢10幾年日日都咁坎坷，每月得嗰4,195蚊嘅長生津，交咗2,800蚊租，要靠朋友自願接濟開飯，你話慘唔慘呀？唔淒涼就呃你嘅啫，唔淒涼點會走嚟呢度住呢？但，只要我捱得、忍到，仲可以照顧到自己，就唔覺自己係咁慘，做人要能屈能伸，拎得起放得低，馬死要落地行，冇辦法㗎啦！要去面對現實，但我好硬頸，從來唔會喊！」
儘管生活變遷，黃夏蕙仍然堅信能從「胡家的基金」中，爭取到自己應得的一份，並計劃放入她的慈善基金，用於興建老人院，幫助無依的老人家。她直言：「自己94歲啦，都係食兩碗飯，用錢唔多，而且個個仔女都能獨當一面搵到錢，唔使我養，就算俾幾千萬我都冇乜用。」而在旁的Philip不平則鳴：「當日，胡百全心願都係想『BB』能安享晚年，唔使擔心咁多嘢啫，既然胡老先生（胡禧堂）嘅基金仍然運作中，咁點解受某啲阻力，唔按胡百全嘅生前意願執行呢？咁樣對一位94歲嘅老人家嚟講唔公平。」
