發佈時間：18:04 2026-10-10
在香港的飲食界中，要數長青且深受官商名流及演藝界推崇的「明星私房飯堂」，位於銅鑼灣的這間飯店必定榜上有名。這間創立於1986年的老字號粵菜館，至今已走過40個年頭。
當年，這間飯店的創辦人憑着「不落味精」的堅持，所以吸引無數明星食客，紛紛前來朝聖，譬如：張學友、劉德華、佘詩曼、容祖兒、張智霖和袁詠儀、霍啟剛和郭晶晶、奧斯卡影帝艾哲倫‧保迪等，就連多任前特首也前來探店。至於令一眾名人、明星最垂涎三尺的，一定是這裏的名物—糯米釀雞翼。
食客變老闆
現任飯店老闆Jacky，本身就是這間老字號的忠實食客。談起當年初次光顧的經歷，他依然記憶猶新：「其實農圃飯店呢個係第二個店址嚟，第一個店址喺我哋後面，嗰時比較大啲有兩層。我好記得嗰時嚟，就係畀佢嘅『糯米釀雞翼』吸引住，跟住我就已經念念不忘，經常為咗呢隻雞翼再嚟食飯。」
2011年，Jacky正式入股接棒經營，他笑言這完全是一場出於不捨的緣份：「當時創辦人想退休，內地有啲投資者想買咗個品牌去經營，但他好想留番農圃傳統粵菜嘅形式繼續經營，擔心如果內地資金入嚟，文化同菜式會改變咗。佢希望搵番一個熟悉農圃，又欣賞農圃嘅熟客接手。我本身唔係做餐飲，但我覺得農圃呢個品牌同埋員工都好有進取心，菜式又穩定，我唔忍心睇住佢轉手後會變質，所以就決定承接落嚟。」
女神回憶殺
餐廳由開業至今，明星不絕，就連國際巨星都有，提及店內的星級陣容，老闆 Jacky亦忍不住自豪的分享：「張學友、劉德華、佘詩曼、袁詠儀等，咁仲有一啲政府嘅要員，例如前特首曾蔭權、梁振英，都係我哋嘅熟客嚟嘅。」這張縱橫演藝圈與政商界的名單，足見餐廳在香港名流心目中的地位。
性感女神崔碧珈（Anita），亦是飯店的忠實常客。她自十多歲起便跟隨父母到這裏聚餐，並在因緣際會之下認識老闆Jacky，兩人更成為無話不談的好朋友。長大後的Anita每次蒞臨，除必點童年的回憶殺「糯米釀雞翼」外，還有最回味無窮兼極具份量的「蟹粉魚翅」。她大讚這道菜的做法極為講究，鮮甜的蟹膏風味完全融入每一絲魚翅之中，濃郁入味，口感豐富。每次品嚐完一碗滿滿蟹膏香氣的蟹粉魚翅，再配上一隻外脆內軟的招牌釀雞翼，對她來說就是人生一大滿足。
「是但」成名菜
飯店之所以能夠留得住各方刁鑽食客的胃，憑的就是對食材本味的極致追求。Jacky透露，不少明星好友來到都有自己的私房心水菜單：「好似伍衛國咁，佢就好鍾意食我哋嘅名菜『是但』，其實佢一啲都唔是但，因為佢只係食海鮮類，好多嘢都唔食；另外仲有甜品脆麻花，佢每次嚟都會叫我預備好俾佢；而李思捷就好鍾意食黑胡椒蟹。」當中獲名流爭相點選的招牌菜「是但」，名稱源於港人平日點菜時的口頭禪，由前老闆靈機一觸設計而成，其實是海鮮蒸蛋，如今已成為店內的代表名菜。
接手經營十五年，Jacky陪着餐廳走過不少風浪，特別是疫情期間，「疫情嗰陣真係最困難，當時整個餐飲業好多要停止經營，嗰段時間公司虧損咗過千萬，真係幾難先捱過。𠵱家叫做捱過咗，但通關之後好多香港人去咗國內或者外國消費，對本地餐飲都有幾大影響。」
第三代食客
雖然面對大環境的挑戰，但Jacky坦言對農圃有一份解不開的情意結，更因為有許多三代同堂的熟客支持，這亦是他堅持做落去的最大動力，「呢度嘅食客真係好重情，有啲去到第三代都仲嚟食飯，大讚我哋可以保持到四十年的味道。今年係四十周年，我哋會做啲全新同埋蛻變嘅嘢，譬如推出新菜式。我會繼續經營落去，做好產品同服務，希望多啲朋友留港消費，繼續支持香港嘅餐飲業！」老闆堅持做好的食物，食客當然堅持繼續幫襯啦！
