發佈時間：18:39 2025-05-26
搵食艱難！現時唱個酒樓騷，除了賣唱，隨時仲要出賣色相！
在《中年好聲音３》100強止步的參賽者禤振華（Dave），近日在酒樓登台獻唱時，冷不防被台下狂野婆婆生擒三度送吻兼索吻，原本左閃右避的他，接過婆婆的500蚊打賞後，竟然乖乖就範錫錫她面珠回禮，片段震撼網民。
現年40歲的Dave，原來過去十多年一直在音樂路上努力，希望有朝一日在樂壇發光發亮。可是由08年參加英皇新秀，到去年參加《中3》，其名字亦未能令觀眾留下印象。不過酒樓登台片段流出後，他即一錫成名，人氣火速飆升。「我好多謝婆婆，唔係因為嗰張500蚊，而係呢件事令更多人知道，有一個歌手叫禤振華。」
嗱嗱嗱！聽落呢單嘢婆婆功勞最大，有機會再見面，Dave真係要大大力錫多婆婆兩啖獎勵吓！
五嚿水的誘惑
自《中3》一燈出局後，禤振華過去十個月，不時以業餘歌手身份，穿梭酒樓聯歡晚宴大展歌喉，但今次遇上狂野阿婆，是他始料不及的事，這天他接受本刊訪問時重組事件，「嗰晚喺酒樓聯歡晚宴上唱歌助興，當唱到〈狂野之城〉時，我如常落台同觀眾互動握手，期間見婆婆叫我埋去影相咪行過去囉，冇預計過婆婆會咁熱情，佢錫落嚟嗰吓，真係有啲措手不及㗎！當刻都唔知點做好，始終大庭廣眾，有啲怕羞，但婆婆仲係咁示意我錫番佢。」
片中所見，婆婆不斷將面珠送向Dave嘴邊，起初他不斷迴避，直至婆婆從手袋掏出一張500蚊塞到他手上，見他眼神忐忑說：「我咁大個仔未錫過女仔嘛！」企圖用語言偽術來避過一劫，但婆婆轉數亦快，神回一句：「我都唔係女仔嚟㗎！」在現場人士起哄下，Dave猶豫咗一下，匆匆錫了婆婆一啖，便告完事，五嚿水袋袋平安。
片段流出後，網上出現大量負評，有人不屑他為錢出賣自己，亦有人指其行為核凸又嘔心，但他卻豁達地說：「我哋做演藝事業，每次去登台唱歌，都係想帶俾觀眾開心，嗰刻現場氣氛高漲，我就係咁意錫番婆婆一啖。有人話係咪為咗$500錫佢？但其實喺呢類場合，台下觀眾好多時都會送吓禮物，有啲又會俾封利是，係好平常嘅事，我當係一份鼓勵。其實好多粉絲只係會攞簽名同影合照，今次婆婆算係我遇過最熱情嘅粉絲，但佢開心，我冇所謂。只係冇諗過條片反響咁大，連微博、小紅書都不斷有人轉發，今次真係衝出咗香港呀！」
食得鹹魚抵得渴，Dave笑言有朋友借此開他玩笑，他亦不太介懷，「雖然事後都有朋友攞呢件事嚟笑，但都係點水式講吓笑嗰隻，唔係挖苦我。返到屋企，阿媽都只係講咗句，『阿仔，你上報紙喎！』成件事我冇唔開心，反而仲幾開心，因為終於開始有人留意到我，真係要多謝婆婆。不過，下次再遇到啲咁熱情嘅婆婆，我一定會保持距離。」
參加過《英皇新秀》街唱儲粉絲
正職是首飾推銷員的Dave，自小喜歡唱歌，08年參加過《英皇新秀》，之後又參加一些業餘歌唱比賽。有段時間，他每周都約朋友到旺角西洋菜街busking。
「大約喺2010年左右，嗰陣每逢周五，我同班朋友仔就抬住個大喇叭同音箱，去百老匯戲院斜對面嘅位置唱歌，每晚唱足三個鐘，漸漸就儲落咗一班fans。」
之後有朋友找他到酒吧當兼職歌手，「有段時間我喺太子同尖沙咀嘅酒吧唱歌，唔少fans都會跟住去捧場，有時佢哋仲會點唱，如黎明嘅〈夏日傾情〉、謝霆鋒嘅〈玉蝴蝶〉、林峯嘅〈愛在記憶中找你〉等都係我經常會唱嘅歌。」
組團闖樂壇
去年禤振華參加《中年好聲音3》，雖然在100強演出中只得到一燈遭淘汰，但亦令他認識一班新朋友。「參加《中3》，我好單純只係想去參觀TVB，見識時下歌唱比賽嘅玩法，同證明自己實力。可惜結果只得到一燈出局，最初係幾失落，但亦開心識到一班好朋友。」
早前禤振華更加入了由一班《中3》出局歌手，包括區瑞強胞弟區瑞明等，組成的音樂團伙「超聲團」，曾在《區瑞強70大SHOW演唱會》中演出。「『超聲團』係今年初組成，大家都鍾意唱歌，我係最遲加入嗰個，我哋本月底會喺澳門酒店開騷，6月喺香港教會亦有一場音樂會，嚟緊亦有新歌派台，目標係希望一齊成功，大家都有屬於自己嘅歌。」
已有固定伴侶的他笑言，女朋友也支持他繼續追夢，「佢話想做就去做，唔好錯過咗先嚟抱怨，做咗，結果點都好，自己接受到咪得囉！」
其實唱歌又好，錫阿婆又好，都係嗰句：搵食啫！
