發佈時間：18:48 2023-09-29
你還記得，18歲的自己嗎？
青春綻放的時候，連走路也特別輕盈，看看今年4月才18歲的炎明熹，有着比同齡的年輕人更淡定的氣場，原因？十分簡單。
「下個月（10月）我就舉行人生第一個個人演唱會，真係好期待！𠵱家我喺返學嘅同時，都積極咁為演唱會準備。」
說時雙眼閃閃發亮，剛剛於理工大學展開大學生生涯的炎明熹，臉上沒有兼顧課業跟事業的疲憊，反而充滿了期盼。
「唱歌係我一直以嚟嘅夢想，可以擁有一個專屬於自己嘅舞台，對我嚟講原本係一件遙不可及嘅事，但係𠵱家喺我18歲呢一年，就可以實現到，係一個好難得嘅機會，俾我同粉絲分享一個特別嘅時刻。」
原本只舉行一場的演唱會，也因門票秒速售罄，旋即加開多一場，對入行未夠兩年的18歲少女而言，更是一支強心針，「我會更加努力，用我嘅歌去答謝每一個支持我嘅朋友！有佢哋，我先可以繼續向夢想邁進。」
追夢無分年齡，不論是18歲還是80歲，有心便事成。
處女個唱更賣力
談到處女演唱會就能夠得到廣大樂迷的支持，炎明熹難掩興奮心情，「喺正式賣飛嘅前一晚，我仲緊張到瞓唔着，真係冇諗過反應咁好！喺開賣冇幾耐，我已經不斷收到歌迷喺社交網站私訊我，話買唔到飛，好唔開心。」
粉絲們一票難求，更有黃牛黨「趁火打劫」，聲稱手握前排靚位門票，非常猖狂。炎明熹得悉後，第一時間向公司反映問題，於是令原本只於10月7日舉行的演唱會，加開10月8日終極尾場。
「之前睇啲前輩歌手開演唱會嘅報道，會煩惱歌迷買唔到飛，又會心痛佢哋幫襯黃牛黨，𠵱家我終於身同感受。好多謝公司配合，好快就應承加多一場，但因為場地問題，唔可以再加。我想喺度呼籲我嘅歌迷，真係唔好幫襯黃牛黨，希望加場之後，大家都可以買到飛啦！」
由一場變兩場，炎明熹坦言，每一場也俾足120%獻技，而為了給粉絲帶來驚喜，她還有一些小心思。
「只要我攞起支咪，就會珍惜每一次演出，唱好每一首歌，為咗多謝歌迷嘅支持，我會雙倍俾心機。不過，我唔係得個講字，好似啱啱派台嘅新歌〈回甘〉，就係我第一次有份參與埋創作同監製嘅作品，講回憶嘅美好。
「另外，𠵱家我仲同一班幕後嘅團隊，研究緊可唔可以將一首我好鍾意嘅日本歌，改編成廣東話版本，歌係Yuga（優河）唱嘅〈灯火〉，我成日聽呢首歌，希望可以同樂迷分享。」
事業學業兩兼顧
全情投入為演唱會籌備，炎明熹同時也要做好其「大學生」的身份。「雖然要面對大量英文嘅課堂，但係我啲同學都好友善，會問我使唔使幫手。」
她還信心滿滿稱，不擔心工作影響大學成績，「中學嘅時候，我每日都要上堂，但係自己都可以安排得好好；𠵱家大學唔使日日上堂，彈性大咗，我自己都可以調校，有一種如魚得水嘅感覺。」
魚與熊掌間，炎明熹想的是「Why not both？」，現實是，她也有需要取捨的時候。
「我參加唔到學校嘅O-Camp（迎新活動），因為咁啱我有工作要做，去唔到對我嚟講，有好處亦都有壞處，好處就係冇好處；壞處就係，我係一個慢熱嘅人，本來諗住喺O-Camp識吓啲同學仔，之後就可以有溝通，但係去唔到，就惟有慢慢同啲同學熟絡啦。」
現修讀Scheme in Fashion的炎明熹，可能預視到要兼顧事業跟學業，所以於繁忙的生活開始前，就跟兩位要好的中學同學，到台灣自由行。
說起好姊妹，她的笑容也特別燦爛，「我哋係3劍俠嚟㗎！哈哈！我哋6月嘅台灣之旅，係Plan咗好耐㗎嘞，係我咁大個女，第一次由買機票、Book酒店、計劃行程⋯⋯全部都係自己做晒！
「因為Budget有限，所以我哋都要慳住用，不過窮遊都係一個好好嘅體驗！」
