發佈時間：14:56 2025-04-04
近日楊卓娜在《奪命提示》中飾演精神萎靡的清潔女工娟姐，再被網友評為天花板級演技。日前，楊卓娜接受《東周刊》訪問時，提及網友的激讚，她就坦言自己沒有接受過真真正正的演技訓練，但對每個角色都會認真的揣摩，會去貼近角色，而最重要的是自己都會有人生經歷，每段經歷對投入角色都會有很大的幫助。就如每當提起對後父劬勞未報的遺憾，楊卓娜那把讓人揪心的哭聲，又與娟姐有幾分相似。
楊卓娜4歲喪父 作文逃避寫「我的父親」
「我不是科班出身，但每接一個角色，我都會先用心去感受佢係咩人。娟姐呢個角色，化老妝只係表面，表達那種生命俾佢嘅折磨、好想搵個窿去收埋自己嘅滄桑感更加重要。加上我曾經有情緒上的創傷，或者人生經歷係幫到我演繹得更細緻。」
楊卓娜的人生經歷，要由4歲喪父開始說起。但話題剛起，她已忍不住潸然淚下。「……sorry，其實我好怕講屋企，好怕講自己……」
哭了近分半鐘，她才能忍着淚說下去，「我好細個，親生父親就走咗，所以我對佢無乜印象，讀書時如果要寫『我的父親』，我會逃避，會同老師講改為寫『我的母親』。」
幫母親倒垃圾、派傳單幫補家計
楊卓娜三母女相依為命，為減輕母親的工作負擔，原名楊娜的她，會和妹妹楊怡（現已改名楊茜堯）一起幫母親倒垃圾、派傳單，家中每逢屋漏，更是由她一手一腳裝修。
「當年為咗慳錢，屋企所有破爛都係由我去處理，剷灰、髹油，我乜都識。不過細個覺得好好玩，見到崩壞嘅屋企，由一家人夾手夾腳去修理好，那份滿足比任何嘢都珍貴。」
母親因無法獨力照顧兩姊妹，偶爾會將她放在姨媽家寄宿，「有時去大姨媽度住，有時去細姨媽度住，初初都會唔開心，就算姨媽係親人，但要我去一個陌生嘅地方，一住就住半個月，有時住1、2個月，始終唔慣，不過當時都無得揀，惟有跟住表哥表姐去玩。」
繼父的出現，令一家人的生活得以改善。然而提起繼父，她又是淚流不止。
「繼父好傳統，對我特別嚴厲。我同佢關係唔好，甚至想過離家出走。直至佢重病離開，我才發現好在意佢，只係性格倔強，唔識得表達……有啲創傷係無形嘅，我情緒咁波動，唔係因為我缺失咗咩，而係我發覺我好愛佢……」
喊爆分享同胞妹楊茜堯有個「約定」
因為失去過，令楊卓娜更重視親情，尤其與胞妹楊茜堯的姊妹情。「我和阿妹同常人一樣會嘈交、打交，仲試過互掟拖鞋添，但每次同爸爸有咩爭拗，阿妹都好撐我。好正㗎我個妹，大家見佢好硬蹦蹦，其實都係一種自我保護，尤其是做娛樂圈呢行。而我嘅自我保護方式，可能係搵個罩去罩住自己。」
兩姊妹的情感，在吵吵鬧鬧中堆積成長。說起去年12月發生的一件事，她再次激動至淚如雨下。「後父的死忌是聖誕前後，舊年12月我剛自國內拍完劇返港，就約咗阿妹一齊去拜祭佢。途中因為我揸車揸錯路而遲到，而阿妹之後又要趕住去開會，所以大家通電話時就有啲爭拗，講咗啲互相傷害嘅說話。當我到達落車嗰刻，阿妹即刻走埋嚟攬住我，因為佢覺得自己講咗啲說話hurt咗我，嗰刻我哋兩個攬住一齊喊……姊妹就係咁，無論講錯咩說話，都唔會有隔夜仇。」
說起妹妹早年與她的一個「約定」，本已制止的淚水，又再奪眶而出。「有次傾偈，我哋好懷念細個一齊成長的日子，雖然唔富裕，但係好開心。跟住佢話：『家姐，我約定你，我哋將來要住埋一齊，就算唔住同一間屋，都要住隔籬屋……』」
今年初的台慶頒獎禮，楊卓娜憑劇集《黑色月光》競逐最佳女配角，雖然最後大熱倒灶，但最近她在《奪命提示》中飾演清潔女工娟姐，再被網友評為天花板級演技。
