誰不想人生四季如春？然而只得直線的旅程，還算精彩豐盛嗎？
51歲的馬浚偉，入行30年，歲月悄悄溜走的同時，其臉上淡淡的笑容，從不或缺。
「其實唔係做訪問，咁多傳媒朋友都話，今年係我入行30年，我都唔記得咗。」
不是他善忘，而是因為他正全情投入，籌備即將舉行的音樂會，主題恰巧為《幸福．春夏秋冬》，「我希望透過音樂會，陪住大家，走過幸福嘅春夏秋冬。」
要讓人感到幸福，先決條件是製作人馬浚偉，自身帶着滿滿的幸福感。早已透過主持的電台節目，發放正能量的他笑言：「做電台節目，有啲聽眾同我分享自己嘅故事，我都會同佢哋講，真係唔開心嘅話，要俾自己喊，抒發情緒。而我相信，藝術係最好嘅治療。」
誰想過現在猶如「正能幸福發放器」的馬浚偉，曾因抑壓自己，而受驚恐症和抑鬱症折磨，幸有信仰令他走出陰霾；去年經歷喪父之痛，他也游刃有餘，低調處理私人事務後，繼續昂首闊步。
歲月如歌，馬浚偉隨心而行，
冷暖自知，最悠然。

藝術結晶

近年積極參與藝術創作的馬浚偉，相隔4年再舉行音樂會，不單身兼監製，還同時兼任創作、藝術總監 、主唱4職。
「今次嘅Concert係以創新元素，為觀眾帶嚟耳目一新嘅沉浸式視覺音樂享受，將會顛覆傳統嘅Concert。演唱會集結咗Immersive（沉浸式演出）、Visual Art（視覺藝術）、Music Therapy（音樂治療）三大元素，我想觀眾會有一種返到屋企嘅幸福感。」
音樂會的每一細節，由構思、劇本、選曲，到選角、視覺效果等，他全部也參與，「兩個幾鐘嘅Concert，我揀咗20幾首歌，由Nat Kong Cole，到哥哥張國榮、林奕匡、張天賦嘅歌都有，大家係唔會諗到呢啲嚟自唔同年代嘅歌，點樣可以串連起嚟。
「而每一首歌，配合燈光、效果，加埋氣味，係一個4D嘅體驗，帶出春夏秋冬四季。對觀眾嚟講仲係一個藝術治療，我特別請咗一位情緒治療專家，幫我審核我嘅想法啱唔啱，有冇治療作用。」

學不停步

除積極地於藝術界展現新思維，馬浚偉於個人學習上，亦一刻也未有停下來。他先於2018年，修讀北京大學光華管理學院的EMBA（行政人員工商管理碩士課程），並在2020年畢業，又完成咖啡師課程，拿了約20張證書，前年又報讀了一個遙距大學課程，獲得香港認可的學位資格。
「係呀，我終於可以講，我係一個大學生嘞！因為我以前冇機會讀大學，係有遺憾嘅，亦係一個情意結，所以到自己有能力承擔學費嘅時候，就再去讀書。」
他現時正修讀一個6年的神學課程，又於教大修讀教育碩士，大約需要上兩年實體課。
「自從讀完北大嘅課程，我就越想去學更多嘢，我唔貪心嘅，只係揀自己有興趣嘅範疇去讀。而上咗唔同嘅課程之後，我覺得自己嘅視野同思維，的確有咗微妙嘅變化。
「好似睇同一件事，我會搵到更加多可能性，將自己嘅工作經驗，配合課程嘅知識，發揮得更加好。」
而馬浚偉所選讀的科目，原來也環環相扣。「因為我有自己嘅公司同團隊，所以讀管理係好有幫助嘅；我喺神學選修嘅科目，就同心靈輔導有關；教大嘅學科，就對建構藝術工作有幫助。
「我要提升專業知識，先可以去開班教導學生。透過教育工作，我可以接觸更加多年輕人，幫佢哋去發展佢哋嘅演藝工作，咁先可以傳承。」

無限斜棟

雖說學海無涯，但馬浚偉於不同範疇的求知慾，偶爾也會令他需要取捨，「其實早兩年我仲讀埋中醫，但係讀咗3個Module（模塊），就要幫TVB同港台做嘢，真係唧唔到時間繼續讀落去。」
然而，他對當時所學的，仍能學以致用。「啲人話瞓得唔好，可能因為精神緊張，或者壓力太大，其實可能只係個胃唔好，嗱，唔係代表全部都係㗎！『胃不和，則臥不安』，個胃唔好，就胃酸過多；飲食唔正常，一瞓低，心跳就亂晒籠，咁個人咪籮籮攣。」
所以，馬浚偉甚少吃煎炸、生冷食物，連興起時喝汽水，也只喝室溫汽水，悶？至少他的外在跟內在也保持佳態。「我做Body check，醫生都話我嘅狀態好好。」
有狀態，才能令他兼顧多項工作，除了演出跟創作，這數年間，馬浚偉先後出任TVB藝術訓練中心校長、香港電台的創作總監，還有自去年11月起，成為康樂文化事務署劇場發展小組委員會的指派委員；今年則出任香港藝術發展局電影及媒體藝術範疇委員，任期兩年。
有宗教信仰的他笑言，像有神的安排，「2020年我為港台主持節目，當時電台廣播處長李百全，提議我正式加入港台，不過因我要兼任演員，唔可能成為全職公務員，就以合約形式，同港台合作。
「而公職令我可以為演藝界發聲，為年輕一輩嘅藝術工作者，尋找更多機會，我好樂意做佢哋嘅引導人。」

時管•黃雨KOL

KOL盛行多時，而馬浚偉的「專業」，大概你也知道，是「黃雨系」。
說他是「黃雨KOL」，當事人聞言即瞇一瞇雙眼，旋即笑言：「我成日收到啲Cap圖，好多朋友真係當我係KOL咁。」
蘇拉威力強橫，幸好8號風球一早高高掛，令這位出鏡率頻繁的KOL，是次可以唞唞。然而，聽罷馬浚偉每天的緊密行程，假若要他當KOL，要代表的，並非黃雨這麼雞毛蒜皮的範疇，而是時間管理。
「與其話係時間管理，其實我只係善用時間。我每日朝早7點就起身，盡量善用時間，好似今日咁，我要開早餐會，之後就要為音樂會繼續籌備，𠵱家做訪問，完成之後又要返公司開會。
「好多時我都會運用車程嘅時間，去睇一啲資料、課本、聽歌、記歌詞，盡量唔浪費每一分每一秒。我仲可以有時間做運動，打我鍾意嘅羽毛球、乒乓波，最近仲跑番步添。最重要係，每一樣都係我鍾意做嘅嘢。」
事業、課程，加上個人喜愛的活動，把馬浚偉的生活塞得滿滿，難得是他樂在其中，KOL與否，Who cares？