發佈時間：17:13 2025-02-17
30歲東張女神「貓仔」黎寬怡（Kitty）與拍拖9年的攝影師男友馮俊昇（Sing），早前宣佈結婚兼進行過大禮儀式。昨日（16日）兩人舉行婚禮，身為教徒的他們，早上跟足中式傳統進行婚嫁儀式，下午於西環聖堂舉行婚禮，晚上在港島區某酒店設宴19圍，逾230人參與；期間播出8分鐘求婚片感動全場，黎寬怡亦喊咗幾次，與老公Sing更鍚足咁多場勁甜蜜。Sing表示未來會帶貓仔多去旅行享受二人世界；而貓仔亦多謝老公對她的包容，承諾會為Sing生番個仔。
感動喊兼錫鍚勁甜蜜
昨日黎寬怡與老公Sing先在家中進行出門入門儀式，兄弟團及姊妹團各有7人。早上進行接新娘、玩親郎、給開門利是和宣讀愛的宣言，感動的貓仔不忘與老公溫馨親吻。現場所見，黎寬怡身穿佈滿金色和白色精緻刺繡圖樣的裙褂，頸上戴着花花牌金鏈、手上戴着龍鳳鈪及頭戴金步搖，與老公下跪向長輩敬茶，場面感人！
一對新人下午在西環聖堂舉行天主教儀式婚禮，披着白色頭紗、身穿入膊露肩低胸魚尾婚紗的黎寬怡，手捧白色花球、挽着父親手臂進場。期間發表結婚感言時，黎寬怡一度感動落淚，二人在眾多親友見證下完成婚禮，並開心咀嘴。婚禮後他們在副堂舉行雞尾酒會，超過300人參加，場面盛大又熱鬧！
晚上黎寬怡與老公在港島區某酒店設宴19圍，期間播出8分鐘求婚片感動全場，黎寛怡再次感動落淚。在一眾賓客歡呼下，黎寬怡與老公一再錫錫，真係咀足咁多場！Sing表示未來會帶貓仔去多啲旅行，享受二人世界；而貓仔亦多謝老公對她的包容，承諾會為Sing生番個仔。
愛情長跑終開花結果
黎寬怡與老公Sing結婚當日正好是拍拖9周年，黎寬怡曾透露與Sing相識於拍攝比賽，有一次因幾個朋友約睇戲甩底而造就二人約會的機會，她直言：「嗰陣啱啱同前度分手兩日，又傷心又難過，仲要畀班朋友仔賣甩咗。我咪膽粗粗直接約阿Sing陪我睇戲，點知佢真係好想睇呢部戲，所以我哋兩個就照出咗去睇。」經過多次接觸和相處後互生情愫。
黎寬怡大讚老公Sing善良、溫柔、細心、富幽默感、有親和力和孝順，唯一缺點是對食物要求好高：「好彩佢煮嘢食好叻，婚後佢會教我煮嘢食，唔使我餓死。」黎寬怡和阿Sing都是教徒，但早前二人仍跟足傳統儀式進行過大禮，除了鮑參翅肚、8大精美禮籃和龍鳳嫁囍禮餅外，還有兩對巨型龍鳳鈪和4條金頸鍊，其他禮品甚至多到一張枱都「放唔晒」，要額外加多兩張枱兼放滿地下，足見阿Sing非常愛錫太太。
延伸內容：「東張女神」封盤 黎寬怡 : 我好恨嫁
延伸內容：《東張西望》主持黎寬怡再遇襲！ 遭粗暴推跌落地大叫求助
延伸內容： 旅行暴飲暴食 黎寬怡狂操保「女神」地位
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
