發佈時間：14:44 2025-02-17
陳美齡（Agnes）相隔4年將於本月28日及3月1日在屯門大會堂舉行2場親子音樂會，她興奮表示首次與香港管弦樂團合作，更搵嚟廖國敏做指揮。由於主題是兒童、愛與和平，除了唱出她比較流行的歌曲，也會與香港兒童合唱團合作，演繹多首不同語言的童謠。最興奮是今次音樂會會加入遊戲環節，希望可與台下的小朋友互動。她稱大仔和平，今次會帶埋妻女一同回港支持，令她興奮又緊張！
首與香港管弦樂團合作
一直致力推廣兒童教育的陳美齡，對上一次舉行演唱會已是2021年，她表示：「當時我係差唔多出道過咗50年，所以舉行咗1場《美麗人生半世紀》演唱會。」相隔4年，陳美齡將於本月28日一連兩日在屯門大會堂演奏廳舉行2場音樂會，她開心稱：「今次係親子音樂會，而且係第一次同香港管弦樂團合作，所以興奮又榮幸，除咗有廖國敏做指揮，仲會有香港兒童合唱團同我一齊合唱，所以我真係非常非常之高興。」
由於是親子音樂會，主題圍繞兒童、愛與和平，「除咗會唱我比較流行啲嘅歌曲，又會講吓點解兒童喺我人生入面係咁緊要，唔係淨係我3個仔，仲有好多兒童影響咗我人生，每一個故事都有隻歌，會做個咁嘅環節；我仲會同香港兒童合唱團做一個環節，唱出幾首世界嘅童謠，用好多語言嚟唱，有中文、英文、韓文、日文同印尼話等。」
與小朋友玩遊戲互動
由於陳美齡想與嚟睇演唱會的小朋友有更多互動，所以在演唱會中會加入遊戲環節，她笑言：「會叫啲小朋友同管弦樂團一齊玩，指揮佢哋吹BB（哨子），我已經買晒啲BB，一人派一個，我諗會好好玩同好緊張，因為一指揮佢哋就要吹BB。」
現時離演唱會不到兩星期時間，問她有甚麼準備時？陳美齡直言：「因為我過年前有咳，所以已經睇咗醫生，亦開始練聲，加上要編曲同整Rundown，唱邊隻歌先？邊隻歌後？幾時有管弦樂團獨奏？幾時我唱歌？其實已經決定晒，𠵱家我要同香港兒童合唱團練歌，我都好興奮同期待，可以同小朋友一齊唱歌。」
齊了解世界兒童狀況
對演唱會有咩期望？陳美齡續說：「我希望爸爸媽媽帶埋小朋友一齊嚟睇，因為我希望小朋友可以欣賞到管弦樂團嘅音樂，可能會影響佢哋對音樂嘅興趣，我亦希望透過演唱會等大家知道世界兒童嘅狀況，因為有一個環節係講世界兒童嘅狀況，再講吓和平係幾咁重要。」
除了傳遞愛的訊息，她希望來捧場的大小朋友到場玩得開心、聽得高興，亦希望與廖指揮能擦出音樂上的火花，「讓大家睇到一個音樂水準高嘅音樂會，大家好輕鬆、好溫馨、好難忘，一家大細睇完後親子關係都好咗。」
家人闔府統請支持
屆時屋企人會來支持嗎？她續稱：「會吖，我啲家姐固然會全家闔府統請咁嚟，同埋我大仔（和平）會返嚟睇，仲會帶埋我個孫女，所以我興奮，又好緊張，因為有咁多屋企人反而令我好緊張，（大仔有睇過你嘅演唱會？）當然有睇過，但新抱未睇過，個孫都未見過我唱歌，佢哋淨係知道我係奶奶、我係阿嫲咋嘛，我諗佢哋會『嘩』好驚喜！（會否請大仔上台？）唔得㗎！我大仔話唔可以，唔可以畀個女露面。」
港樂 x 陳美齡：親子音樂會
日期：2月28日（星期五）、3月1日（星期六）
時間：晚上8時
地點：屯門大會堂演奏廳
門票：$350 / $250 / $150
購票及查詢：按此
（音樂會招持3歲及以上人士）
延伸內容：陳美齡發起「我為甚麼喜歡這一本書」寫作比賽今日啟動 3招教父母幫小朋友愛閱讀
延伸內容：和孩子溝通最重要 | 陳美齡
延伸內容：培養學霸有計 | 陳美齡
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
