發佈時間：17:03 2025-02-11
名模陳嘉容（Eunis）好鍾意日本，所以多年前曾學過日文，但因工作忙放低多年冇講而忘記晒，最近想重拾番，於是報了福岡為期兩星期的遊學團，每天上課5小時學日文，晚上做功課和溫習，放假又可以遊景點、歎美食，最正是一個人浸溫泉，可放空放空，她稱現時與日本人簡單交談和到餐廳點菜都冇問題，所以去日本玩好爽！早前接過結婚花球的她，新年願望是有喜事發生。
日頭上堂夜晚做功課
Eunis稱因為好鍾意日本呢個地方，如果識日文，去當地旅遊時會方便、玩得開心啲。但因近年工作太忙，已放低日文好耐，好多字都忘記了，所以趁早前有假期，便打算去學習、順道休息Relax下。她參加了日本福岡兩星期遊學團學日文，「每日食完早餐去上堂，跟住食Lunch，下午上多3個鐘就放學，夜晚喺酒店做功課同溫習。」她續稱每班約5至6人，都是來自英國、美國和瑞士等地的同學，她覺得好似回到學生時代，感覺好開心。
順道到福岡景點遊覽
她又表示到星期六、日放假，她還可以去遊景點。其實她已去過福岡好多次，因喜歡當地較純樸、又不會有太多遊客，豈料今次到福岡由布園和動物園遊覽時，都多人好熱鬧！美食方面，她當然不少得食刺身和海膽，還品嘗了串燒大蝦、咖喱芝士牛肉包和蟹肉海鮮飯，同樣美味。而最Relax都是一個人去浸溫泉，放空感覺超正！
問她現時日文程度是？Eunis表示與當地人簡單交談、講笑，或到餐廳點菜都冇問題。再問她同學們知道她是香港名模嗎？她笑言：「原本唔知，畢業嗰日我哋交換Instagram，佢哋先知我係Model，有啲嚇親，跟住話我好靚好靚，真係客氣！」
希望今年有喜事發生
踏入蛇年，她表示嚟緊會忙於做禮儀導師的Training工作，「會教禮儀、教著衫配搭同教人做模特兒擺甫士、行Catwalk等。」至於新年願望？她續說：「身體健康、世界和平，希望唔好再打仗；經濟快啲好番，人人都有安穩嘅生活。而愛我嘅人繼續愛我，我愛嘅人繼續愛佢；同埋我之前接到個結婚花球，希望有好事發生、有喜事發生！」
