疫情改變了本地餐飲業的市場及經營模式，美心集團首席營運官（香港及澳門）蕭德威觀察到，疫情改變了港人飲食習慣，集團會迎合市場需要，提供不同服務。

為重振本地經濟，政府已力谷夜市活動，亦有商場延長營業時間兼推夜間優惠響應，蕭德威指美心集團餐飲生意已回復疫前約八至九成，大前提要旅客和商務客重臨，晚市生意才會變得「無咁靜」。集團在疫情期間，亦積極推進數碼發展，早前推出結合實體及虛擬之Web3美食手機遊戲「eatie」和另一款提供網上訂座、預購食物等服務的手機App「Eatizen」，來實現直接行銷及帶動業務增長。而年前從日本引進品牌「燒肉LIKE」，已開設了十六間分店，未來會繼續引進新品牌，為食客帶來新的餐飲體驗，「有好嘢我先擺上枱!」

美心近年積極推進數碼發展，早前推出結合實體及虛擬之Web3美食手機遊戲「eatie」和另一款提供網上訂座、預購食物等服務的手機App「Eatizen」，美心集團首席營運官（香港及澳門）蕭德威稱︰「手遊是大勢所趨，大家都會打機，就將手遊、美心集團和餐飲連結一齊。」

蕭德威認為活在當下，最緊要開心，「現在好多人都唔夠開心，想大家食飯之餘又可以得到娛樂，於是大膽用手遊去做。」藉此吸引後生仔甚至中年食客，每到星期五，又會推送「星期五又點可以冇美食助興呢？」用家可參與Hungry Flyday，成功完成遊戲可以贏到焗豬扒飯。「入面有不同的簡單遊戲，如點樣可以整個蛋糕，透個遊戲搜集食材去整，成功之後會有優惠券，再去幫襯我哋旗下西餅、快餐等，吸引不同階層的食客。」

註冊成為「Eatizen」會員，用家在「著數」一欄就可見到不同優惠券，更用Top10、中菜、西餐、快餐等去分類，非常便捷。有不少小朋友和港女喜歡的Kuromi & My Melody，可用八五折優惠券購買蛋糕。「對生意最有幫助的，就係用家用到入面不同嘅優惠券。」App內亦有印仔卡，「買六個麵包就送一個，希望食開快餐或者買開麵包的客人買密啲就會用印仔卡方式。」

遊戲加餐飲增優惠

現仍處於起步階段，至上周五有數十萬會員，希望用家認識旗下七十多個品牌，「除了早午晚三餐外，買麵包、月餅等都諗起集團旗下品牌，一年三百六十五日都可以幫襯我哋，試吓唔同嘅嘢。」問到數碼發展的投資金額，蕭德威笑說：「投放資源一定唔少，不過實際數字無意思，今日同你講十萬，過多幾年可能變咗千萬，只會增加投資，永遠不會完。」

疫情間除了「兩餸飯」遍地開花外，蕭德威觀察到，疫情改變了港人飲食習慣，「早午兩餐夾埋食Brunch，晚餐提早食，疫情前一日食三、四餐，現在大部人改習慣食兩、三餐。」

為迎合市塲需要，集團也會跟着市塲走。旗下部分餐廳五點半已開始做晚市，「晚上商場冇人，引起連帶關係，零售提早關門，冇客情況下食肆最夜都只可以做到九點，我想開長啲都唔得，無理由蝕燈油火蠟。」他提到，遊客和商務客減少亦影響晚市生意，「晚市較靜，我相信遊客多啲，夜市都會好啲。商務客多請食飯，生意又會好啲，政府做夜繽紛，集團亦有在小紅書做宣傳，但現時內地客整體消費能力都差咗，好多只嚟影相打卡唔消費。」

引入「燒肉LIKE」爆紅

蕭德威上周平日晚上巡店，見到羅素街「燒肉LIKE」分店晚上七時已需要排隊等入座，「大家真係食早咗。」美心疫情期間從日本引進品牌「燒肉LIKE」，現時本港有十六間分店，品牌賣點就是令燒肉變得平民化，客人亦可獨自使用一個無煙烤爐，成為一種全新的餐飲模式。他十一歲的細仔亦十分喜歡這個新品牌，「佢鍾意自己燒，我又教吓佢唔燒燶的秘技。細仔意見都重要，推出市面前會搵佢一齊試，如果佢話唔好食，會返去同同事反映再改，年輕人比較直接，一係好食一係唔好食。」

集團每年都有新品牌推出市面，「不斷睇緊，好多品牌都主動搵我哋，希望引進不同餐飲體驗到香港、內地和東南亞。不過有好嘢我先擺上枱！過唔到我自己個關都唔會推出嚟。事實上業主都想我哋有新嘢，令個新場有熱話或具獨立性。」新開的圍方和AIRSIDE各有集團旗下八個和四個品牌。

集團現時開近二千間舖，會繼續拓展本地及海外地區業務，「內地現時有約三百間舖，你都知內地千萬變化，兩年個品牌仲在已經好叻，我們都做得不錯；東南亞則主要用星巴克和元氣進場，元氣在新加坡好成功，燒肉LIKE在泰國亦做得不錯。」

公司飯堂有助留住員工

踏入美心集團中心的員工飯堂，見到巨型林明禎海報，原來集團早前請大馬女神代言，宣傳以剩餘麵包釀製的手工啤酒BOB。宣傳片中她問觀眾：「睥咩睥？麵包變啤酒，唔得咩？」

蕭德威說員工飯堂更是新產品試驗基地，「好似有新咖喱醬就畀大家試食；引入新品牌前亦會先進行內部試食，看看價錢和份量要否再修訂，所以冇FREE LUNCH 㗎，大家要寫字畀意見。」

他續說，每個企業都要注重員工福利，當中食是最基本，若公司能給員工一個好的用餐環境、食品質素甚至服務，「你會留到人嘅! 好似集團七百個寫字樓員工肯定有餐食，亦可自由選擇在外面用膳。」他自己就最喜歡吃飯堂的燒味。

於是集團亦把此宗旨發揚光大，幫其他企業、醫院和學校等營運飯堂，留住員工的心。「他們認為集團水準平均，其中有個客是一間國際學校，我們提供了一星期『Shake Shack』，搬個爐去整漢堡畀學生食，連老師、家長都好開心。政府都會搵我哋，但有時位置太遠或出價太低，真係搞唔到。」