發佈時間：17:45 2023-10-04
港人有福了，返「家鄉」日本旅遊越來越抵玩，日圓匯價持續走低，昨日兌美元一度觸及150大關，而每百日圓兌港元亦徘徊在5.2水平，即在日本食一碗價值1000 Yen的拉麵，只需港幣52蚊，遠抵過在香港的日式拉麵店。
不過，日圓匯價兌美元昨晚一跌至約150水平，突然在5分鐘內抽升至147左右，市場猜測日本央行出手干預，力頂150大關。不過，日本財政省主管外匯事務的副大臣神田真人對不評論有否出手干預，但重申如判斷需要干預時便會出手，再次強調「反對匯率過度波動」。
央行干預效力減弱
事實上，去年10月日圓兌美元亦一度跌至150水平，當時日本央行直接出手干擾匯價，大舉拋售美債及美元，其後日圓匯率持續上升，兌美元一度回升至128左右，然而在美息持續攀升下，日圓匯價再次調頭下挫。
另一方面，日本通脹雖然已連續十多個月維持在目標央行通脹2%樓上，市場一度認為日本需要加息，但日本央行行長植田和男卻強調，未有信心日本通脹可以「長期維持」在2%，並會維持量化寬鬆政策，導致日圓匯率持續偏軟。
恒生銀行首席市場策略員溫灼培分析稱，現時國際大環境與去年10月不同，「去年日本央行可以沽美債同美元去頂日圓匯價，但今次唔會好似上年10月咁沽。因為美國在今年6月1 日解除債務上限之後，要發更多美債，其他國家都唔係好買，個別國家仲要沽緊，作為美國好朋友嘅日本，我唔覺得佢會沽，所以日本央行好難好似上次咁大規模干預。」
他又稱，目前美國債息持續高企，限制了日本央行干預匯價的能力，「雖然日本央行唔承認噚日有干預，但我諗唔到咁抽法唔係央行做可以有咩因素啦。不過，你見佢哋力度又唔係大，主要因為,依家同舊年好唔同，依家美國10年期國債息率抽到去16年新高，上年唔係咁，個息差咁大，日本央行出手力度被限制咗，所以都係去到147左右就無力。」
至於未來日圓走勢，溫灼培認為仍要關注兌美元150大關，「啲炒家一定會再試日本央行係未真係干預，即係會再沽到去150水平，睇吓日本央行係未真係再出手頂，因為大家睇到噚日個力度都唔係好大，如果試多一兩次都喺150水平頂住，炒家就會可能調反轉做，如果守唔住就會再跌。」
再大跌空間不大
不過，他認為日圓再大跌的空間不大，「我估日圓再跌都係去到152水平左右，我估美國再加息都係吹水，未必有能力再加，美國眾議院議長麥卡錫都無得撈，新一份財政預算都可能出事，影響美國經濟，依家個息去到呢個位，仲點再加呢？」至於要去日本旅行的港人，溫灼培認為可以依家都唱定部分日圓，「去旅行唱定啲就唔阻你啦，反正嗰幾十點都唔係差太多！」
