2024港姐三甲人馬新鮮出爐，原本應是焦點所在，但原來當晚一眾出席嘉賓包括去撐場的師姐們，一樣咁有睇頭，唔係講着得有幾性感，而係有幾嚇人。當中馮盈盈、劉穎鏇和高海寧相繼失手，反而關楓馨、何沛珈和陳楨怡能脫穎而出。即刻睇下「星級形象指導」郭慶彬（Ricky）選出「超班人馬」、「啱啱合格」和「嚇人一族」有邊幾位？

延伸閱讀：萬千星輝Fashion騷︱星級形象指導辣評25女星　佘詩曼衰保守　陳庭欣大媽上身！

延伸閱讀：金像獎Fashion騷︱ 星級形象指導辣評20女星 劉嘉玲得啖笑 楊偲泳唧出肥肉

超班人馬

關楓馨 女神出場
「條裙好靚，着得佢好女神Feel又恰度好處；雖然佢身形唔算好高，但着得佢比例均勻又高佻，裙色仲好啱佢膚色，映得佢好甜美，冇乜出事位，飾物又襯得啱啱好。」

何沛珈 簡單是美
「着得條晚裝裙好靚，有種簡單就是美嘅感覺，身形比例又好均勻，成個感覺好舒服、好矜貴；同埋化妝、髮形同珠寶首飾都襯得好好，望落好搶眼，值得一讚！」

陳楨怡 好有仙氣
「佢着得好靚，成個感覺好似Barbie公仔咁，條裙顏色同佢雪白膚色又襯得啱啱好，好有仙氣；呢個場合有啲閃令令珠片又幾突出，同埋Ruffle散尾紗裙，演繹得佢身形比例好好，襯埋珠寶同髮型真係唔錯！」

邵初 配襯不俗
「呢個打扮幾啱佢，佢唔算高佻，但呢條女神裙映得佢身形比例啱啱好，高叉修腰又騷到香肩，性感得嚟幾高貴，加埋對高踭鞋，整體襯得好好，感覺都幾靚。」

林鈺洧 整體好Sharp
「條裙紅色好Grand，成個感覺好華麗，又適合呢個場合，古銅色肌膚先最好突出，加上佢高瘦身形，望落比例好均勻，膊頭位個設計又好有動感，整體好Sharp，髮型化妝又啱啱好。」

黎芷珊 乾淨俐落
「佢每次打扮都好穩陣、好啱自己，今次着咗件斜膊連身拖尾長裙，好啱呢個場合同佢嘅年紀，同埋今年都興斜膊，加埋大抽嘅頸鏈同手鈪，成個感覺好華麗，髮型又恰度好處，成個感覺好乾淨俐落。」

李芷晴 公主造型
「條裙好靚，係好典型嘅晚裝造型，感覺係白色公主裙，都營造到個效果，襯蜜糖膚色，望落都幾性感，如果梳番個All back髮型或側邊分界貼服啲仲好睇，另外加多少少首飾更靚。」

莊子璇 配襯一絕
「望落着得好靚又好睇，呢條粉紫色裙Cutting好簡單，裙上嘅Details又特別，着得佢幾有仙氣，仲着得出一種華麗嘅感覺，髮型、化妝又配合得好，值得一讚！」

麥美恩 淡定優雅
「佢嘅打扮都幾突出，因為紅地毯女星通常都係着黑色、紅色同白色，但佢反而着黃色，而黃色都幾蝦人着，佢又着得幾好睇，着得出個感覺幾有份量同淡定優雅，化妝髮型又恰如其分。」

陳貝兒 四平八穩
「其實佢每次嘅打扮都好穩陣、好少出事，好似呢啲紅色珠片裙既搶眼，Cutting又顯得佢身形比例都好均勻，加上好襯佢偏白嘅膚色，整體感覺係好四平八穩。」

陳法蓉 充滿自信
「全黑打扮好高貴，呢條Deep V裙佢都Carry得幾好，騷到佢幾Fit嘅身形，再加上一頭短髮、白滑肌膚同適量嘅珠寶首飾，襯得好，着出自信嘅感覺。」

啱啱合格

陳庭欣 不過不失
「感覺都穩陣，因為佢身形夠瘦，襯呢條銀色裙唔算最靚，但都合格，加埋簡潔嘅珠寶，騷到佢流麗嘅肩頸線條，個妝唔算好誇張，嘴唇淡番少少會更加完美，算不過不失。」

江美儀 跟番潮流
「佢成日想營造中性嘅感覺，所以今次都ok，最靚講唔上，但又唔算核突，值得讚嘅係上身嘅透視手袖若隱若現，都幾啱今年個Trend，但如果戴番條簡單嘅鑽石頸鏈會好睇啲。」

葉蒨文 合格打扮
「合格喇，其實墨綠色都幾難Carry，但又襯到佢嘅膚色，而且裙嘅設計顯得佢身形比例都突出，美中不足係個高叉位唔算騷到佢好長腿，同埋對鞋換番露趾鞋會靚啲。」

莊思明 手套扣分
「佢身形比例一向好好，着晚裝唔會有難度，而全黑騷肩露腿嘅造型都幾有睇頭，但加咗手套好似密實咗，其實唔要手套、加番少少飾物，換埋對露趾涼鞋，效果會更好。」

梁麗翹 打扮一般
「金色裙好難Carry，一係好靚，一係好娘，佢算係中間不過不失；戴咗對金色大花耳環浮誇咗啲，最奇怪係佢襯咗隻好似皮帶嘅手錶，如果襯鈪應該會好睇啲。」

詹天文 有點老土
「條裙都唔錯嘅，幾啱佢身形，Ruffles又貼番今年潮流嘅主題，有層次感，放喺佢身上比例都ok；出事在佢對白色Boots同髮型都有啲老土，紮馬尾會後生啲。」

嚇人一族

郭珮文 映得大隻
「雖然收起性感着咗條入膊裙，但反而映得佢好大隻，又突出唔到佢嘅S身形，如果着番深色會襯佢多啲，唯一值得讚係佢嘅化妝同髮形，襯晚裝幾好睇。」

馮盈盈 仙氣欠奉
「條裙嘅顏色、設計同剪裁都靚，無奈佢有啲想營造仙女下凡嘅感覺，刻意整嘅髮型同頭飾有啲作狀，所以着得好一般、冇乜美感，嘥咗條裙，其實簡單配襯已經可以。」

王灝兒 「肥」玫瑰花
「條裙映得佢好肥，加上佢身形唔高佻，膊窄腳短，感覺有啲漲爆，揀呢條裙真係失敗之選，令人眼球受罪，蛇皮鞋先最恐怖，正宗敗筆，唯一可讚係髮型紮起乾淨、加番少少分。」

鍾柔美 亂七八糟
「條白色裙本身幾靚幾簡單，但着喺佢身上有啲奇怪，因襯咗對有啲複雜嘅鞋同咁多豬二繩，加埋長髮同濃妝，襯得太多嘢有啲亂七八糟，成個感覺降咗Grade。如果少啲飾物同個妝淡啲、梳番馬尾，會啱佢年紀多啲。」

吳幸美 酒廊歌手
「條裙款式有啲過時，好似80年代歌手登台唱酒廊嗰啲Feel，而且着到佢有少少肥同有啲橫同腰長腳短，雖然映得佢身材豐滿，但身形比例望落唔係咁平均，加上髮型、耳環都唔襯，唯一係健康膚色同裙色相襯。」

古佩玲 老土娘爆
「條裙都幾靚，但着喺佢身上有啲老土，佢着唔出高貴嘅感覺，而且對厚底露趾涼鞋真係好娘，加埋個髮型都唔係呢個年代，頸上嗰條絲帶又古怪，加埋咁白嘅妝，一啲都唔襯。」

黃嘉雯 骨瘦如柴
「條裙着到佢有啲骨瘦如柴，個鎖骨位太凸，感覺係擔唔起條裙；同埋佢個妝太濃，離遠睇塊面同個身係兩隻色，加上個髮型Colour太橙唔多襯。」

謝嘉怡 出嫁Feel
「佢真係揀錯裙，𠵱家好似出嫁Feel咁，感覺紅得嚟暗啞無光，花嘅圖案又老土，嘥咗佢個甜美靚樣，其實古銅色肌膚襯白色或淺色會好睇啲。」

劉穎鏇 敗筆之作 
「佢身形比例好好，但打扮好一般，因為去到啲咁隆重嘅場合，呢啲Cocktail Dress真係唔係咁啱，好明顯係揀錯裙，裙嘅Cutting又有啲古怪，佢膚色襯呢隻黑灰色好似烏雲蓋頂，銀色尖頭鞋同條又唔係好Match！」

郭柏研 剪裁不當
「明顯條裙嘅Cutting有啲問題，個胸位好似打咗摺，其實佢有條件着得好靚，因為個樣好Sharp，又有Barbie身形，所以條裙真係唔啱佢，同埋太珠光寶氣Over咗。」

張名雅 隻腳扣分
「打扮望落都幾正常、幾好睇，原本條裙都Ok，但望真啲，對腳一撻撻，失準冇美感扣晒分，佢仲好刻意咁露腿，首先對金色高踭鞋唔襯，而指甲兩種色又唔襯，嘥咗個靚樣。」

陳懿德 裙款唔襯
「條裙嘅花瓣腳其實都幾難Carry，佢算着得Ok，不過襯呢對厚底高踭鞋又有啲難頂，以佢身形比例有條件可以着得再靚啲，下次揀裙時可嘗試A-line嘅款式！」

高海寧 格格不入
「原本條裙嘅款式、剪裁同色調都好襯佢，但最失敗係襯咗呢對鞋，因為好似返工鞋，點解唔襯對幼帶嘅高踭鞋呢？勁格格不入，嘥咗佢悉心嘅打扮。」

黃美琪 恐怖肉酸
「晚裝連身褲着得佢有啲恐怖同肉酸，因為呢個橙色同質地真係好難着，要Super Model先Carry到，所以佢嘅身形真係負擔唔起，連身褲嘅Cutting又古怪，着到佢好臃腫。」

關嘉敏 有點成熟
「遠睇好似冇乜嘢，近睇條裙啲花好疏落，感覺好奇怪，桃紅色着得佢有啲成熟，加上心形耳環同手鈪都唔係呢個年代Out Out哋，嘥晒佢天賦嘅身形。」

廖慧儀 條裙減分
「呢條晚裝裙佢着得唔算靚，因為佢太瘦，啲鎖骨位露晒出嚟；同埋條裙嘅感覺唔高貴，Cutting又一般，加上髮型同飾物效果都好普通。」