《萬千星輝頒獎典禮2023》周日晚（14日）在澳門圓滿落幕，一眾女星均以高貴美艷造型示人，望脫穎而出搶到觀眾目光，不過着得靚唔靚、襯唔襯自己真係見仁見智。「星級形象指導」郭慶彬（Ricky）就話部份女星穿出大將之風，當中以出爐「最佳女配角」高海寧、「飛躍進步女藝員」劉穎鏇和「最佳女主持」麥美恩最出色；不過不失的包括三料視后佘詩曼，當然更有些是慘不忍睹，着衫都要講Talent，一失手容易淪為笑柄。

標青一族

大將之風     高海寧-White Privee連身裙 
「着得好靚、好Grand、好有大將之風，又有壓台感，條裙設計好聰明，喺腰開咗個窿，令佢更加纖瘦，性感度恰到好處，個紫色又襯到佢膚色，襯埋髮型、化妝、飾物好Perfect。」

女神Feel     劉穎鏇- Victor Chan訂製連身裙　
「其實呢啲泰山裝好難着，着得唔好會好大隻，但佢骨架Carry得好好，映得佢身形比例好均勻，高叉設計又帶出若隱若現嘅性感，後面好似披肩嘅設計令佢好有女神Feel。」

簡約流麗　麥美恩-The House Of Viola Chan 訂製連身裙
「條裙紅黑色好Sharp，個設計又簡約，線條好流麗，行出嚟啲Ruffle好有動感，着到佢好Fit，仲好啱呢個場合，非常恰到好處。」

突圍而出　陳貝兒-SHERNY連身裙 $100萬/ 首飾 謝瑞麟（頸鏈、耳環、戒指）$500萬
「黑色晚裝着得佢好靚、好突出，好欣賞佢個透視嘅娃娃袖，條裙閃炅炅加埋耀眼嘅鑽石頸鏈，襯埋尖頭鞋一絕，由頭到腳都盡顯心思。」

Modern修長　蔡思貝　
「全黑晚裝Carry得好好，既突出又搶眼，騷到身形同修長嘅美腿，襯露趾鞋令對腳更修長，裙嘅設計又Modern，加埋對耳環同貼服嘅髮型啱啱好。」

大方得體　車婉婉　
「佢着得好睇，因為佢有標準九頭身嘅高度，領口位特別，仲要露背，一身若隱若現嘅性感，加埋簡單髮型同配襯少少飾物，顯出大方得體同高貴嘅感覺。」

「一般」群組

保守打扮　佘詩曼—連身裙 Toni Maticevski／首飾 Harry Winston　
「其實佢可以着得好Grand，呢條黑色露肩長裙都騷到佢身形，但就算加咗啲珠光寶氣嘅首飾，都係打扮一般冇驚喜，略嫌普通同保守。」

裙長尷尬　吳若希　
「粉藍色裙望落幾舒服，好襯佢膚色，閃令令感覺又Grand，都騷到佢人魚嘅Figure，髮型化妝好乾淨，唯一條裙長度有啲尷尬，遮住高鞋會好啲，同埋可以戴番少少飾物如耳環同戒指就Perfect喇！」

恰到好處　陳法蓉　
「黑金顏色搶眼，V領位置又恰到好處，唔會太賣弄性感，襯埋個短髮都幾Sharp，但打扮算一般，值得一讚係身形同皮膚都Keep得好好。」

穩穩陣陣　林夏薇　
「白色晚裝裙都穩陣嘅，長度又啱啱好，佢揀得都幾有Taste，個手袖位又映得佢膊位好適中好均勻，化妝髮型都恰度好處，可惜頸鏈只係襯得ok。」

出事一族

格格不入　黃翠如　
「個樣都精緻、身形又夠瘦，可以着到好多衫，但黑白色配搭真係平淡冇光彩，最奇怪個Ruffle手袖，有啲格格不入。」

似魔鬼魚　李施嬅　
「見到佢第一個感覺好似海洋公園嘅魔鬼魚，嗰個斗篷設計好輪盡又格格不入，着到佢A字膊，條頸鏈又太Over，一啲都唔襯。」

論盡大隻　劉佩玥　
「呢件Silver Colour嘅晚裝好靚，但着到佢好輪盡，映得佢好大隻，手袖位太長有啲奇怪，條裙着到佢下身有啲肥，佢真係揀錯戰衣。」

似伴娘裙　龔嘉欣　
「淡粉紅色晚裝不過不失，好靚好突出又唔係，好肉酸又唔算，但有少少似伴娘裙、妹仔Feel，如果條裙修到身形同腰線位會更加好睇。」

手袖敗筆　何依婷　
「佢有靚鎖骨位、標準身形同標緻面孔，但着呢條裙好一般，因為太似婚紗裙，而最敗筆係手袖位，感覺臃腫又大嚿，冇咗仲好！」

為露而露　何沛珈　
「佢條裙好似垃圾膠袋咁，珠片加埋白色線Outline有啲奇怪，中空設計係性感，但好似為露而露，望落唔夠大體。」

感覺老氣　傅嘉莉　
「條裙既搶眼又Sharp，着到佢好似Barbie公仔咁，但咁堆砌落佢身上唔係想像中咁靚，因為襯呢個髮型老氣咗、成熟咗，如果梳番個復古頭會好啲。」

打扮好Hea　王敏奕　
「佢呢個打扮都幾Hea，其實花裙嘅裙型係靚嘅，但感覺啲花有啲老土，襯啲飾物求其又唔算，但都好普通，唔夠搶眼。」

大媽Feel　陳庭欣
「好老積、好老氣仲有啲大媽feel，上露下露唔討好，要性感但胸口加塊布有啲唔拖唔水，中袖設計又奇怪，襯呢對高踭鞋映得隻腳又肥又短，欠缺美感。」

髮型扣分   古佩玲　
「條裙顏色靚又有設計，可惜揀錯主人，因為呢個色唔係人人Carry到，好唔襯佢膚色，加埋呢個東菇頭真係扣晒分。」

自暴其短　王灝兒
「着黑色原以為可以映得瘦啲，但佢本身身形都係粗線條，所以有啲自暴其短，現到佢有肚腩，手臂位又麒麟臂，加埋粗腿，設計複雜唔啱佢。」

老積老成　鍾柔美
「着得好老積、好老成，同佢年紀都唔襯，好似攞咗佢阿媽件衫去飲咁，最恐怖係對厚底鞋，想映得高啲，反而着到佢又肥又矮。」

打扮唔襯　姚焯菲　
「條裙着到佢有啲肥，啲打摺位又映到佢有肚腩，對厚底鞋又好Outdated，加埋啲珠光寶氣扮成熟，同佢年紀真係唔Match！」

好老人精　詹天文　
「望落好似朵食人花咁，個Ruffle咁大好驚，佢又Carry唔到，條裙唔長唔短又尷尬，最唔掂係對厚底鞋，𠵱家都唔興喇，加埋啲珠光寶氣好老人精。」

比例好短　游嘉欣　
「好明顯係唔靚，首先個髮型唔得，個蝴蝶結扮𡃁妹，晚裝裙嘅設計又有紗又有珠有啲複雜，佢Carry唔到，映得佢身形比例好短。」