發佈時間：10:00 2026-02-10
馬年就快到，正所謂「新年新景象」，勝出《通靈之王》第一季冠軍的塔羅師羅泳嫻，和MIRROR星級化妝師Annie G. Chan，決定雙劍合璧，過兩招等大家在新一年由年頭行運到腳趾尾。
羅泳嫻說：「我哋會介紹2026年12星座嘅性格，適合乜嘢顏色嘅妝容同飾物配搭來催運，祝大家新一年樣樣都好！」Annie G. Chan則說：「化妝要配合星座之餘，仲要啱自己，最緊要身體健康同開心！」頭炮先帶嚟水象星座系列：巨蟹座、天蠍座、雙魚座。
水象星座系列
巨蟹座（22/6-22/7）銀白色
巨蟹座比較顧家、顧慮他人的感受，但要識得保護自己，設底線才不會被人欺負。羅泳嫻說：「巨蟹座嘅守護星係月亮，幸運顏色分別有銀色、白色同藍色。始終係水象星座，建議化一啲感情豐富嘅妝容。」
Annie G. Chan就指透明感最緊要，「要化銀白色highlight，望落去塊面令咗。女仔唔使擔心會顯得大件，只要喺鼻位置highlight，唔好成塊面就得。藍色方面，可以戴隱形眼鏡或者整藍色指甲。」
天蠍座（24/10-22/11）暗黑紅
天蠍座性格重感情，易受傷害，有神秘感。羅泳嫻說：「天蠍座嘅幸運色係深紅色、紫色、灰色，運用得好可以令佢哋有一種神秘感，亦適合戴金運石、紅鸞法石。」
Annie G. Chan就覺得天蠍座宜穿黑色衣服，「頭髮黑啲幾有型，最好搽個紅色嘴，但中國人搽晒成個紅色嘴好核突，可以試吓搽中間先，再用手指印開，咁出嚟效果會自然同少女啲。」
雙魚座（19/2-20/3）海洋色系
水象星座，幸運顏色比較特別，全部都是海洋色系。羅泳嫻說：「雙魚座俾人感覺活潑、機靈，如果身上用藍色，會發揮到長處。藍色有好多層次，好似天空藍、粉藍。而幸運星係海王星，海王星最強就係嗰種浪漫嘅魅力。」
Annie G. Chan點頭和應：「我諗起魚鱗反光，有藍、粉紅，跟住個海飄下飄下。化妝時，可以加啲粉紅或者幻彩顏色落眼影、面同嘴，最緊要有閃令令嘅效果。」
延伸內容：羅泳嫻2026年12星座運程| 人馬座、摩羯座、水瓶座、雙魚座運程 | 東周2026年開運指南
延伸內容：羅泳嫻2026年12星座運程| 白羊座、金牛座、雙子座、巨蟹座運程 | 東周2026年開運指南
延伸內容：羅泳嫻2026年12星座運程| 獅子座、處女座、天秤座、天蝎座運程 | 東周2026年開運指南
