陸叔開Chat | 六號幹線一脈連城

由將軍澳往返油麻地,繁忙時間要成個鐘,觀塘繞道亦經常塞車。因此將於十二月六日全線通車,可將油麻地至將軍澳車程縮短到十二分鐘嘅六號幹線,可謂萬眾期待。中九龍繞道(九龍灣段)係六號幹線工程最後一段,早前進行巴士道路測試,兩間專營巴士公司派出六部雙層巴士,測試經繞道往返油麻地與將軍澳,象徵通車準備進入最後階段。

九龍灣段接駁將藍隧道同埋中九龍繞道(油麻地段),將成條六號幹線連接起嚟,為九龍東西、茶果嶺同將軍澳整體交通提供分流。六號幹線嘅願景係「一刻到達,一脈連城」,而全線通車後,預料可紓緩九龍東西及茶果嶺一帶擠塞情況,車程將大幅縮短,打造出十二分鐘城市圈。

六號幹線項目團隊與海上吉祥物(Roady、工程獅、出行寶、Agent T)合照打卡。

為咗令市民對幹線加深認識,土木工程拓展署喺公眾參與層面落足功夫,包括早前舉辦嘅「六號幹線脈動嘉年華」。嘉年華選址觀塘海濱舉行,喺中九龍繞道(九龍灣段)隧道旁邊,而呼應幹線「一脈連城」理念,嘉年華分為「油麻地區」、「啟德區」同「將軍澳區」,以攤位遊戲形式,宣傳六號幹線嘅社會效益、工程技術細節、規劃發展同埋交通路線等。

交通基建項目進行公眾參與,外國亦有先例,如巴黎大巴黎快線定期開放畀公眾參觀,市民甚至可以走入未來車站嘅施工現場。澳洲墨爾本地鐵隧道亦喺市中心設訪客中心,透過VR導賞、3D城市模型、遊戲教育課程等互動方式,畀參觀者學到由隧道工程以至鑽挖技術,到走線規劃、地質同考古等知識。

值得一提嘅係,脈動嘉年華嘅攤位同打卡點,好玩好睇之餘,背後仲有特別故事。例如,浮台上嘅海上吉祥物,象徵今次項目由運輸及物流局、土拓署、路政署同運輸署等部門通力協作,完成極具挑戰嘅項目。另外,「挑戰地質極限」攤位,就將工程難關變成遊戲,參加者可以從中體會工程團隊施工期間真實面對嘅困難。

九龍灣段最主要部分係海底隧道,深入觀塘避風塘海床,穿越海堤同茶果嶺岩石層直達藍田。由於海底地質複雜,工程團隊需要克服填土、海泥、風化石、堅硬石層等地質問題,先能夠順利興建隧道。團隊因而引入創新技術,全面提升工地安全同檢測效率。

呢條海底隧道,正正喺嘉年華會場對開海面之下,活動同工程互相呼應。以往大型基建嘅公眾參與,多數集中喺法定諮詢期,討論收地、環境影響等硬核問題。近年逐步引入更吸睛、更有趣嘅公眾參與活動,除咗起宣傳作用,仲將較深奧難明嘅鋼筋混凝土基建工程,變成一個個可以親身體驗、參與嘅故事。土拓署近年積極喺各區大型工程旁,利用空間和MiC建築設立社區聯絡中心,又興建東岸板道等海濱步道,令市民輕鬆了解香港基建,並令公眾樂於參與。

更多文章