兩大快餐龍頭齊出盈喜。大快活預計中期溢利大增一點四倍至一點六倍，並表示創新產品成功擴大客戶群並帶動收益，有分析將盈喜嘅功勞歸於旗下嘅「食得夠GYM」餐單同埋一眾捧場嘅Gym友。大家樂亦預計半年純利多賺一點○五倍至一點二五倍，有分析指其優惠及健身套餐幫市民慳錢並改善健康，雞胸肉成為業績「奇兵」。
以往，打工仔中午食飯一係留意價錢牌，一係揀味道，但近年最吸睛嘅可能係「蛋白質含量」。例如大快活雞胸飯標榜有多於四十九克蛋白質，大家樂雞胸飯同樣列明有五十克，麥當勞板燒雞腿包都標明有約二十二克蛋白質，宣傳可謂「Protein蓋地」。網民仲點名呼喚連鎖炸雞快餐店加入「蛋白質經濟」。
蛋白質之所以深受追捧，同健身文化帶動嘅飲食風氣不無關係。近年掀起操肌熱潮，而蛋白質攝取量正正能影響操肌效果。健身風氣帶動下，健康餐已經唔再限於小眾健身族，逐漸變成大眾需求。美團旗下外賣平台Keeta曾指健康輕食訂單增長不俗，見得到健康餐有需求同增長潛力。
Gym餐之所以突圍而出，係靠「定價、口味、營養」三者平衡。
不過，羅兵咸永道（PwC）亦有調查發現，香港人揀餐飲最大考慮因素仍然係價格同口感。而傳統健康餐十分講究食材同製作，成本因此較高。根據消委會對部分健康便當外送服務公司嘅調查，餐點定價為每餐六十至一百蚊不等。餐廳提供嘅健康餐選擇亦通常較其他餐貴，唔少人因而卻步。
Gym餐之所以突圍而出，係靠「定價、口味、營養」三者平衡。例如，有快餐店嘅雞胸肉採用先煎後焗雙重烹調，令肉質保持鮮嫩，擺脫雞胸無味兼嚡烚烚嘅印象。而同市面一般健康餐相比，呢類營養快餐定價較親民，只需約五、六十蚊。亦有提供營養資訊同自訂化選擇，方便顧客計算自己嘅營養需要，仲可以加多隻蛋或者雞胸增加蛋白質。連鎖快餐店分店網絡遍布全港，借助其規模，有助健康快餐更廣泛普及，甚至形成風氣。
除本地外，外地亦流行高營養餐點。外國連鎖快餐店除重視蛋白質，亦強調膳食纖維同整體營養價值嘅重要性，歐美甚至曾流行「膳食纖維攝取量最大化」（fibremaxxing）。台灣輕食盛行，7-Eleven估計，今年蛋白質相關食品飲品業績可高達五十億元新台幣。全家便利商店更以「餐食輕享化」作為策略，將麵包同餐點「輕盈化」、「減糖化」，反映健康餐嘅潛力不限於正餐。
坊間對於何謂健康飲食有眾多講法，我個人比較保守，傾向均衡飲食，好似衞生防護中心建議嘅「健康飲食金字塔」原則，以穀物類為主，並多食蔬果，加上適量肉、魚、蛋和奶類；減油、鹽、糖；食肉盡量去肥剩瘦，多採用蒸、燉、炆、烚及白灼等低脂烹調方法，以求達致飲食均衡。
