近年金融與投資相關騙案愈趨猖獗，根據反詐騙協調中心（ADCC）資料，上年全年共錄得逾五千宗網上投資騙案，損失金額超過三十五億港元，數字非常驚人。騙徒往往揀中持有退休金及積蓄嘅退休長者作為獵物；今年上半年滙豐銀行錄得嘅騙案當中，有兩成涉及長者。另外，擁有私人物業、學歷較高、有投資經驗嘅長者亦需要格外小心，因為騙徒喺推銷所謂投資方案時，會將專業名詞、數據混入其中，令人信以為真。
我個人雖然並冇受騙經驗，但遇到唔少個案，係不法之徒利用我嘅形象去招搖撞騙。其中一個個案，騙徒聲稱自己係「陸叔」，更指自己認識某銀行高層，可以幫事主投資。從事主角度，騙徒唔單止擁有專業投資背景，更加識得金融高層，有齊權威形象同光環，好容易令人「落搭」。
陸叔被人冒認得多，因此真人現身，教人睇穿真相。
就算你短時間內冇上當，騙徒亦會利用花言巧語去攻破心防。喺同一個個案中，當女事主親身到分行核實嗰陣，騙徒反指對方唔信任自己，利用情緒勒索等心理操控手段，意圖令事主產生罪疚感。如果定力唔夠，好容易會失去判斷力而中伏。騙徒有時口甜舌滑，有時又會威逼利誘，「糖同鞭」雙管齊下，令對方墮入騙局。
另一個個案係假「陸叔」聲稱已經同太太離婚，利用人嘅同理心，向女事主大打慘情牌，藉此索取「投資」資金。騙徒放長線釣大魚，足足半年日日同事主談天說地，事主差啲連層樓都按埋畀假「陸叔」。好在事主家人經媒體渠道聯絡我，我親自勸佢迷途知返。事實擺在眼前，但佢心中仍然記掛假「陸叔」嘅甜言蜜語，可見騙徒功力深厚。
騙徒行騙時會跟住劇本演戲咁，有時扮金融界人士，有時扮「陸叔」，轉個頭又會演變成情緣騙案。既然騙徒識演戲，有冇方法可以幫大眾預演劇情，改變結局？
近年外國流行一種畀大眾預先接觸詐騙情境嘅教育手法，稱為參與式「心理疫苗」接種（Participatory Inoculation），培養公眾面對實際騙案時「見招拆招」嘅能力。以模擬情境方式切入，等參與者演練詐騙具體情境，幫佢哋排練一場戲，就好似預先打流感疫苗，建立免疫力一樣。當佢哋真正遇到詐騙劇本嗰陣，就能夠識破並抵抗「詐騙流感」。
所以我除咗口頭提醒之外，早排仲現身ADCC嘅網上短片，提大家投資記住三件事：勿輕信社交平台上嘅「投資教育」廣告；小心主動私訊你嘅人，佢哋有可能冒充投資專家；勿下載不明投資App。稍後亦會參加電視《網罪速「逮」》拍攝，拆開「投資大師」通訊群組真面目，務求做到定期打防騙疫苗。
社會大眾亦要放下對受害者嘅負面標籤，因為騙徒識得運用操控技巧令受害者上釣，過分批評受害者會令佢哋唔敢求助同通報，反而會令騙案變得隱蔽，釀成更大損失。
