人工智能AI浪潮持續，高盛發表報告，指全球AI伺服器需求增，令印刷線路板（PCB）需求量於二○二七年達三百七十五億美元，到二○二八年更將增至八百四十億美元；覆銅面板（CCL）需求亦預計由二○二七年二百二十一億美元，躍升至二○二八年四百八十億美元。換言之，未來兩年行業將迎來量價齊升嘅超級增長周期。
全球電子材料行業龍頭建滔系上周公布中期業績，翌日同集團管理層及各部門老總交流行業現況。建滔集團（148）上半年營業額二百九十一億元（港元，下同），按年升三成五；純利二十七億元。子公司表現更為突出，建滔積層板（1888）上半年純利飆逾兩倍至二十九億元；收入升五成五至一百四十九億元。建滔雙雄報喜，背後主要受惠於AI帶動嘅電子供應鏈需求急升，令上游材料嚴重短缺，尤其電子玻璃纖維布最為緊絀。
建滔張家成（左一）、張國華（右二）和張祖兒（右一）。
AI產品線由執行董事張家成（Eric）和全球市場及研發部總監張祖兒（Jason）兩兄弟領軍。佢哋解釋由於多間競爭對手無法取得電子玻璃纖維布，被逼局部停產，令CCL供應收緊，市場價格自然走高。建滔積層板主席張國華提到，一家下游客戶為「搶板」專登飛過嚟傾，更出動友情牌，話相識幾十年，價由建滔開，最緊要有貨。事實上，供求失衡下，定價權的確喺建滔手上，今年已加價七次；單計今年七月，覆銅面板部門利潤已達十一億元，刷新集團單月紀錄。
上游材料短缺更加嚴重。建滔集團主席張國榮（Paul）分享，玻纖布今年爭崩頭，市場甚至出現炒貨情況，佢預計缺貨至少維持兩年。Paul講笑話玻纖布老總常國強成為全球頭號「通緝犯」，連集團自己板廠都投訴到主席度追布，Jason形容供應鏈已陷入癱瘓。
建滔之所以能夠做到人冇我有，皆因一早鎖定玻纖布生產命脈—豐田織布機。Eric指建滔訂購嘅織布機主力生產高端玻纖布，供應商唔多，豐田未來兩年只能產出四千八百台，即使今日落單，都起碼二○三○年先有貨。因此玻纖布行業可以話係「得機得天下」。建滔早過同行大手訂購二千四百台豐田織布機，鎖定豐田未來兩年產量一半。設備逐步運抵廠房四日即可投產，約兩個半月可以翻本。
玻纖紗、銅箔同環氧樹脂同樣供不應求。市場不但要貨唔要錢，就連認證都加快速度，務求搶貨為上。過去CCL、PCB和上游材料要打入高端客戶供應鏈，認證周期往往要兩至三年，但AI需求急切，認證流程已大幅縮短至幾個月。集團已成功打入NVIDIA供應商台光電和斗山供應鏈，更有部分客戶提出邊買貨邊認證。由於電子材料供應黏度高，合作年期往往長達二、三十年，建滔把握今次市場缺口打入更高端客戶生態圈，相信可以憑一站式AI新材料全面「覆」蓋呢個超長周期。
