環球金融市場波動加劇、宏觀環境充滿不確定性，以及人工智能炒作成風嘅當下，再加上近期美國政府開支持續上升，政府未償還債務總額首度突破四十兆美元，同時海外投資者減持美債，令美國三十年期國債債息一度升穿五點三厘，拖累美國三大指數。另一邊廂，港股曾經歷四連跌，雖及後回升，但走勢仍偏弱。
上星期同大家講解過退休投資嘅理財長勝心法，今期就從宏觀角度，講講投資者可以點樣喺呢個亂局之中自處。早前，我同資深金融專家李錦榮（Bruno）喺電台就大市表現展開討論。Bruno指出，地緣政治、AI、美國利率走勢等因素影響下，投資者普遍對大市持觀望態度。
首先，各界十分關注美國聯儲局議息會議紀錄，希望從中推敲利率方向。新任聯儲局主席主席沃什（Kevin Warsh）上任，大家都觀望今年會唔會減息。雖然沃什曾承諾推行「體制改革」，但Bruno認為現時並無條件促使聯儲局減息。另一方面，美國七月通脹放緩，根據美國最新通脹數據，消費物價指數按年升百分之三點四，係三月以來最慢增速；核心通脹則放緩至百分之二點五，符合市場預期。因此，有大行預期九月加息「極不可能」。
李錦榮（左）退休後積極投身公眾理財教育。
中東局勢持續緊張，唔少人都因為金價攀升而考慮入手黃金。不過，Bruno提醒大家要先搞清楚金價上升嘅原因。全球央行持續入手黃金，主因在於降低對美債及美元體系過度依賴嘅長遠風險，同散戶追逐短期價格升跌嘅買賣邏輯截然不同。因此，央行需求屬重要金價長線訊號，並不反映金價短期升跌。
除地緣政治同利率外，AI都係影響大市一大板塊。AI大語言模型發展一日千里，唔少人覺得投資AI板塊可穩操勝券。事實上，Anthropic同OpenAI等AI龍頭接二連三推出新模型，確實帶動輝達（Nvidia）業績持續成長以及詞元（Token）消耗量持續上漲。不過，雖然基礎設施與晶片等實質需求依然強勁，Bruno覺得大家要分清楚「科技股」同「科幻股」。作為一個理性投資者，唔能夠只着迷於AI模型有幾勁，晶片係咪最新一代，諸如此類嘅抽象概念。
作為經歷過互聯網泡沫嘅投資者，我目睹無數僅憑概念而無盈利模式嘅公司，喺熱潮冷卻後市值大幅蒸發甚至倒閉。所以，選股更加應該考慮公司嘅基本面，例如審視AI應用能否真正為企業產生盈利，可以點樣利好傳統行業，甚至帶動產業升級。
亦可以留意企業嘅現金流是否穩健，資金投放落邊度，呢啲投資最終會唔會帶來實質、額外回報。衡量風險更係重中之重，喺現時息口未明和高波動環境下，應適當控制投資金額，避免盲目追逐過高估值嘅科技股。各項宏觀不確定因素短期內難以完全消退，投資者保住本金至能夠喺市場巨浪中企穩陣腳。
