香港人口持續高齡化，人生下半場越來越長。政府推算，到二○四六年六十五歲或以上長者將達二百七十四萬，佔整體人口約三成六。近年社會開始出現「長壽焦慮」，黃金時代基金會調查發現，受訪者即使已有退休安排，仍擔心資產不足以應付往後生活，原因係退休期已由過去約十至十五年，延長至現時二十至四十年，甚至更長。
退休理財規劃日益重要，筆者上周應邀出席香港警察反詐騙協調中心講座，為準退休及已退休市民提供理財與防騙心法。一生人中，工作搏殺期大約係二十至五十歲，呢三十年間係累積財富嘅黃金階段。登「六」後，主動收入逐步減少，我認為退休理財核心應「先守後攻」，避免將所有資金放進股票或高波動資產。
陸叔分享退休投資長勝心法。
喺資產配置上，可考慮將約一半資金放於保本、定息為主嘅工具，如銀色債券、年金等，為日常生活提供較可預計嘅現金流。約兩成資金則可按個人承受風險能力，投放於有穩定盈利及派息紀錄嘅優質收息股。餘下資金則應保留一定流動性，作醫療、家居維修、家庭支援或突發開支等用途，成為退休生活應急錢。
選股方面，長者應着眼於公司是否真正有賺錢能力、現金流是否健康，以及股息是否由盈利支持，而非單看股息率高低。股價短期可受市場情緒、消息和資金流影響，但長線價值始終建基於企業質素。退休投資應以長線持有、穩定收息為主，減少追逐「即將爆升」嘅股票。部分股票或投資工具本身有潛力，只係風險水平唔適合退休人士。
退休係終身學習嘅好時機。長者可選擇自己感興趣嘅投資板塊，如人工智能、醫療科技或健康產業等，多閱讀報章、留意政策及社會趨勢，做到寓投資於學習。但留意資訊應來自上市公司公告、持牌機構研究及可靠新聞來源，而非陌生WhatsApp群組、社交平台廣告或自稱專家嘅私訊。
當日講座期間，一位長者分享自己喺網上結識一位「假陸叔」，對方以財經名人形象取得佢信任，再游說佢投資股票，雙方更持續交談兩、三年。活動後，個案已交由警方進一步調查。我重申並無任何個人社交媒體帳戶或投資群組，如「陸叔」add你，一定要提高警覺。
詐騙伎倆防不勝防，但防線必須由自己築起。投資緊記循正確途徑「跟錢走」，只使用受監管、可核實嘅交易平台；千祈唔好按陌生人指示，將「投資款項」私下轉入個人或不明公司戶口；一項真正嘅投資交易，款項只會存入你名下嘅銀行或證券行戶口。收到可疑來電或訊息應立即停止接觸，唔好click陌生連結，更加唔好提供個人資料或轉帳；有懷疑可致電警方防騙易熱線18222。
事實上，投資無長勝，但理財謹慎得宜確可以立於不敗。孫子兵法講「知彼知己，百戰不殆」，是求保全實力而非求「百戰百勝」。
