未來就業市場或出現兩個趨勢，其一係AI淘汰舊有職位，其二是AI創造新興工種。
機器人店長即將喺香港「開工」，財政司司長陳茂波透露，一間由港投公司引進嘅內地具身智能企業，將喺紅磡海濱營運首間機械人全自主零售店，機器人店長會提供多種語言服務，由顧客服務、商品展示到銷售結帳，全部自動化。店舖即將投入服務，預示人工智能AI將逐漸滲透到日常生活同商業場景。
AI浪潮令更多行業經歷洗禮，勞工及福利局局長孫玉菡日前喺立法會上表示，二○二二至二五年間，大學畢業生全職職位空缺由約八萬個銳減至三萬一千個，其中編程、行政初級職位係重災區。畢馬威早前發表《二○二六香港就業市場展望》，當中亦指本地企業採用AI比例升至接近七成，按年升一成四；逾兩成受訪管理層預計今年會減少人手。部分重版複性高、流程化強嘅後勤工種將面臨較大縮減壓力。
AI逐漸成為千行百業嘅普惠技術，保安、送餐、快遞、程式員、設計師等職位嘅日常工作，由體力勞動到算力分析，AI都能勝任。未來就業市場或出現兩個趨勢，其一係AI淘汰舊有職位，其二是AI創造新興工種。人類唯有學識駕馭AI，先唔會被AI駕馭，政府同教育界亦必須全力推動AI教學，幫青年裝備自己。
參考香港競爭對手新加坡，正全面推動AI技能普及化，涵蓋基礎至高階人才培訓，目標喺三年內培養十萬名「AI雙語人才」，即同時具備專業技能同AI應用能力。相關措施包括規定明年起高等教育新生必修AI；在職人士可獲資助報讀AI實戰課程；為修讀指定課程嘅國民免費提供六個月進階版AI工具；企業AI相關支出最高可享百分之四百所得稅減免，可見力度之大。
港府最新財政預算案宣布成立「AI+與產業發展策略委員會」，成員包括專家、學者，以及商會、企業和園區公司代表等，初期會聚焦生命健康和具身智能，以及AI不同應用。另為推行「全民AI培訓」，政府已撥款五千萬港元，邀請數碼港、香港科技園公司及香港生產力促進局三間機構，聯同科企、大專院校和商會等，籌辦AI應用課程、講座及比賽等。計劃預期喺今明兩個年度舉辦超過二百場活動，總受惠人數約五萬人次。
為推動AI普及化，香港大學已為全體本科生設立AI素養必修核心課程，系統化介紹AI歷史、科學原理及技術演進。香港中文大學則喺「數碼素養與計算思維」課程中加入生成式AI元素，並開設學科領域專屬AI科目。
事實上，AI教育已成為各國之間嘅競賽。美國聯邦政府發出行政命令，喺中、小學教育系統全程加入AI學習，而六十間科企已承諾提供教材。中國則要求學生由小學起每年接受最少八小時AI教學，並將AI應用融入教學、教科書和課程，務求令國民具備AI熟練度。全民AI，指日可待。
