警方與香港股票分析師協會討論打擊防騙。
各類騙案每日上演，警方數字顯示，今年首季錄得騙案九千四百二十七宗，其中網上投資騙案雖然只佔約一千宗，但損失金額高達六點八億元（港元，下同）。長者受騙宗數則有明顯增幅，按季多一成七，總損失金額五點三億元，增幅近七成，人均損失更達一百○一萬元。
近年富貴長者成為騙徒獵物，警方去年以電話訪問約一千名受騙長者，顯示近六成案件損失介乎十萬至一百萬元，人均損失達八十五萬元。其中七成以上苦主年齡介乎六十至六十九歲，多為剛退休或準退休人士，持有大額退休金及積蓄。值得留意嘅係，教育程度愈高，平均損失金額愈高。小學程度與碩士或以上學歷受害人嘅平均損失，相差接近四倍；具投資經驗嘅長者比一般長者的損失則高出一倍。
今年首季最大單一案件損失金額達八千四百萬元。事緣上年一位外籍男商人，透過Facebook結識自稱投資專家嘅騙徒，並發展成為網上情人。騙徒游說受害人投資加密貨幣，並下載名為「Kitbed」嘅虛假投資程式，將加密資產匯入騙徒指定電子錢包，最後無法提現先知受騙。呢啲就係所謂嘅「殺豬盤」—用感情養到受害人肥肥白白，再一刀殺落去。
騙案雖多，行騙手法卻萬變不離其宗。例如投資騙局往往牽涉假冒網站、社交媒體帳戶、短訊群組等，加上AI令影像和聲音都極度逼真，令人難辨真偽。過去亦不乏詐騙分子偽冒我身份，開設假陸叔Facebook帳戶同WhatsApp群組誘騙投資者，近月更有人用AI做出假陸叔影片，喺YouTube出投資廣告。重要事再講一次，我個人並無任何社交媒體帳戶或投資群組，如有「陸叔」add你，真係要提高警覺，若帖文或短訊有連結更加唔好click。
城大一份研究提到，騙徒常以冒充身份、投資誘導、技術偽裝等方式誘騙受害人投資。對話間經常滲入關鍵字以提高可信度，如承諾「高回報」、「穩賺唔蝕」，誘發受害人貪念；又或以「手快有手慢無」塑造稀缺性與逼切感，觸發目標唔執輸嘅焦慮；又訛稱自己係投資「專家」，有「內幕消息」，以權威包裝自己，博取受害人信任。三部曲一環扣一環，好多人就咁落疊。
早前警方聯同香港股票分析師協會（IFAPC）開始討論合作防騙，希望借助協會嘅專業知識同影響力，一齊拆解騙徒新手法，同時攜手加強公眾教育。另外，金管局今年三月向銀行發出針對投資騙案嘅風險指標指引，要求銀行主動評估客戶轉帳行為，例如突然沽出長期持有嘅藍籌股、要求加大轉帳限額等，都屬於需要查問嘅高危訊號。
騙徒用「穩賺不賠」、「日賺幾千」等關鍵詞引你入局，咁大家就用反詐騙招數傍身，例如設定WhatsApp私隱，選擇「群組」再揀「我的聯絡人」，防止陌生人拉你入群；另外可以用「防騙視伏App」查核可疑電話、網址或收款帳號。總之「停一停」、「查一查」至係「穩陣不賠」關鍵詞。
