當二十二歲中國球手吳宜澤取得「士碌架」世界冠軍之後，有老友叫我在《東周刊》寫一篇關於「士碌架」文章，寫還寫，都要講吓資歷，我對「士碌架」認識有幾深，唔可以亂寫。
在我成長年代，在澳門打「士碌架」都好盛行，打得最好的姓何，老豆開賭； 第二姓林， 自己開書局；第三是一個外號叫「耶穌」的葡國仔；第四輪到我，不過，很少高手喜歡同我打，因為我唔賭錢，只打波鐘。
有人話香港應該犀利過澳門，但好似聽唔到有超卓桌球手，當時在香港打「士碌架」的規則與全世界不接軌，首先香港打五個波，全世界都打十五個；香港是沒有「士碌架」這回事，就算俾對手set到，只要撞枱邊兩次，打到指定的波便可以，現在講當然是匪夷所思，但這是香港當時的規則。有人問傅家俊又如何？傅仔是在加拿大長大，加拿大有很多MALL的地庫都是做枱波生意，大把枱，收費唔貴，老闆甚至畀打得好的人任打，傅家俊就是這個環境下成長，與香港環境沒有關係。
一般人會認為，「士碌架」就是枱波或者桌球，都算冇錯，不過，真正的意思就是唔畀對手有機會，打「士碌架」除了要打得準之外，仲要計機會率，不但要計自己入波的機會，仲要計如果自己入唔到波，對手入波的機會。輸一兩個波，十幾分當然是冇問題，但是打「士碌架」往往就是輸一個chance ， 俾對手起break，最後一Q清袋，就會輸咗盤波。對手如果唔贏，就唔會一Q清袋，所以領先越多，越唔會博，一個一個紅波入，一分一分攞，目的是贏波不是贏分。
我講大家未必會信，「士碌架」是最適合中國人的運動，比乒乓波更加適合，今次由吳宜澤攞世界冠軍，去年由趙心童，今年亦打到入八強，與吳宜澤、趙心童水準差不多的中國球手，大大話話都有十個八個，除非英格蘭、蘇格蘭、愛爾蘭、威爾斯組合為一個體系，否則，如果打團體賽，沒有一個國家可以打贏中國，或者中國香港除外。
我們除了有傅家俊之外，仲有三位世界冠軍以優才來港定居，包括火箭奧蘇利雲、香港姑爺卓林普，以及羅拔臣， 如果團體賽出三個人，打九場波，香港的贏面比中國大，那些前世界冠軍移民來港，其實就是睇中香港市場，有chance搵錢，點解唔嚟。
