在特朗普訪華之前，不少人問我結局會如何，我話要睇特朗普帶甚麼人去，如果帶國務卿魯比奧團隊，一定是傾有關政治議題，例如台灣問題，香港、新疆的人權問題等；如果帶戰爭部長赫格塞斯團隊，一定是軍事威脅，列根號，布殊號航空母艦在南海候命；如果帶財長貝森特團隊，一定是講經濟。如果三個都帶，就要睇團隊人數，無可否認，今次一定講經濟，因為有十七個大企業CEO跟埋一齊去，如果知道講政治、軍事，那些大企業CEO請都唔會去，現在打崩頭才爭到一個位，由此可見，唔講經濟又講乜。
由於今屆世界盃由美國、加拿大、墨西哥合辦，中國與國際足協仍未講掂數，今次特朗普去中國，會不會叫中國重金購入轉播權？老實說，中國可以重金購入，但唔可以做冤大頭，國際足協要求中國的轉播權費用是三億美元，人口同樣是十四億的印度只是三千五百萬美元，雖然有人話，印度的國力與中國相差很遠，畀唔起三億美元，這點我同意，但唔可以相差八倍咁多，如果開價是一億元以下，我相信中國是不會拒絕。今次，國際足協的確開錯價。
不過，我話開錯價的意思除了價錢之外， 還有時間， 開畀印度三千五百萬，開畀中國三億，中國一定唔會買，應該首先開畀中國三億，就算兩億成交，印度點計都唔會少過五千萬美元。做生意最緊要識得分先後，畀得起價錢的客人一定要畀他們揀先。
有人話，做生意買賣，開天索價，落地還錢是天經地義，國際足協做得啱，理論上是沒有錯，其實對生客是可以咁樣做，對熟客就不能。例如一個業主可以向生客開天索價，生客唔租是沒有損失，但如果見舊租客唔能夠搬走而開天索價，最終舊租客或者都要續租，業主以為得逞，但當新簽租約到期時，租客一定會離開。如果業主以合理價錢續約，租客除非生意唔好，否則一定唔會離開。
中國其實一早已經冇打算買世界盃轉播權，否則，就唔會還有一個月仍未講掂數。雖然國際足協已經大幅減價降至一點二億至一點五億美元，但中國只還六至八千萬美元。唔通今次國際足協要飲雪水？有老友問我有冇辦法搞掂，我叫老友請我食燒腩，老友發覺裏面有舊骨。辦法就係，國際足協保證下屆世界盃由中國主辦，中國可以直入決賽周，既然食到燒腩，就唔該要埋舊骨，盛惠一點五億美元，買埋今屆世界盃中國區轉播權。
