利華控股主席兼執行董事司徒志仁（右）。
損益表裏面嘅EBITDA代表未計利息、稅項、折舊及攤銷前盈利， 但最近有人講笑話應該係Earnings before Iran, Tariff and Donald Announcements。其實呢個講法都並非笑話，美國對華關稅反覆無常， 去年累計稅率一度高達百分之一百四十五；同時越南、印尼、柬埔寨等東南亞生產基地亦被全面納入美國「對等關稅」清單，須繳納額外關稅。出口商飽受煎熬，其中紡織同服裝供應鏈更面臨成本飆升、訂單碎片化同違約風險等困難。
去年全球貿易環境動盪，利華控股（1346）喺零售逆風下，全年仍錄得兩億元（美元，下同）收益。主席兼執行董事司徒志仁（Stanley）解畫，收益按年下跌約一成，主要歸因於風險管理考量，集團主動縮減兩大客戶訂單，以控制信用風險，減少壞帳情況，務求以守為攻，故訂單規模難免出現倒退。若撇除呢兩名客戶影響，其餘業務收益實質增長百分之二點七；而毛利率穩守百分之二十八點五穩健水平，反映成本控制奏效。期內公司淨利潤率創下百分之七點九歷史新高。
值得留意一點，貿易應收款項減值虧損淨額扭轉，期內撥回近九萬元，實現零壞帳；現金儲備亦創新高，銀行結餘及現金按年增長兩成一至四千一百五十萬元，整體財務狀況健康。公司末期股息每股七港仙，派息率達五成一，對長線投資者具吸引力。
關稅風波不斷，出口商處於震央，但利華沿用輕資產營運模式，令佢喺關稅風波中保持穩定。公司加工商網絡遍布越南、印尼、孟加拉及柬埔寨等六個國家，目前合作廠房近百間，以便客戶靈活選擇生產地，以降低地緣政治風險。Stanley補充，經過幾輪貿易戰，集團正考慮擴展版圖，計劃進一步拓展至歐洲、南美及北非市場，重點關注葡萄牙、土耳其及秘魯，以加強不同市場布局。
利華作為擁有六十年經驗嘅行業老將，目前手握一百五十個品牌客戶，憑藉多區域、多類別商業模式，有效分散客戶集中風險，亦能夠喺不明朗大環境之下起穩定作用。面對外部挑戰，集團瞄準併購時機，去年底收購澳洲運動服飾供應商Active Apparel Group（AAG）指定資產，以擴充運動服飾業務。今次交易係利華上市後第七宗收購，雙方定位均屬高端，相信可發揮互補優勢。
隨住AI浪潮興起，利華積極推進平台化轉型，例如自動化處理工廠發票、利用AI分析採購訂單及翻譯技術文件，將例行工時縮短達九成。為加快客戶同廠方配對，公司推出數碼雙向市場平台，合資格廠方可如Uber司機般自行接單，目前已有超過三十五間廠商加入，並已完成初步訂單交付。相信利華長遠可乘AI之利，加快盈利增長步伐。
