自從新冠病毒爆發，香港封關三年，令到香港人見過鬼都怕黑，聽到印度爆發尼帕病毒，大家都非常擔心，有人問我對尼帕病毒意見。我話真係大劑，我不是醫生或者生物學專家，根本冇可能畀到意見，不過，我唔講大把人講，但綜合大眾意見，尼帕病毒的死亡率非常高，大約在百分之四十至七十五之間，可以人傳人，而且潛服期很長，五分之一患者會有後遺症，而且沒有疫苗或者特效藥。根據那些人的意見，尼帕病毒的確很恐怖。
我叫大家不用擔心，因為任何病毒最關鍵是感染率，新冠咁恐怖是因為感染率高，我相信有八成香港人試過新冠確診，雖然死亡率低，但仍然是有大殺傷力，而尼帕病毒感染率非常低，如果唔同宿主打茄輪就唔會受到感染。現在受到感染的人雖然冇同宿主直接打茄輪，但食了宿主食過的生果，才受到感染，都算是間接打茄輪。
尼帕病毒最初是一九九八年在馬來西亞一個豬場被發現，點解接近三十年仍然冇疫苗以及特效藥？原因很簡單，受尼帕病毒感染的人不多，就算開發疫苗都冇生意，製藥的人都是生意佬，冇錢賺梗係唔做，所以到現在都冇疫苗以及特效藥。
尼帕病毒宿主就是狐蝠，雖然有人話是果蝠， 其實果蝠是狐蝠一種， 生長在最陰暗， 最污糟的地方，雖然條件咁差，但仍然可以生存，由此可見，狐蝠的適應能力很強，依附在狐幅的尼帕病毒生命力應該很強，但人類沒有必要在尼帕病毒生存的環境生存，所以，這亦是尼帕病毒在近三十年不能夠影響人類原因之一。
前蘇聯有一款戰機外號「狐蝠」，是米格戰機，順序由米格、15、17、19、21，23，到狐蝠是米格25，在發展狐蝠時，西方國家知道，前蘇聯的環境很差，根本不可能發展一種能夠同F-104、F-111抗衡戰機。米格25狐蝠出現，令所有西方軍事專家大跌眼鏡， 至於點解跌眼鏡，F - 1 1 1 極速為二點五馬赫， 大約二千六百公里，米格25為三點二馬赫，大約三千二百公里，空戰是速度決定一切，所以，美國一定要搵出狐幅的秘密。
美國政府要做，一定可以做到，於是CIA出動，狐幅的秘密亦搵到，短短幾隻字就是答案，狐幅是：1+1＞2。原來，狐幅只是用其他米格型號零件堆砌而成，其實亦不意外，如果美國佬有睇如來神掌，就知道第九招萬佛朝宗是由另外八招堆砌而成，威力之大，到現在大家仍然不時提及。不過，大家唔好發夢，狐幅是實實在在，萬佛朝宗是武俠小說而已。
當美國搵到米格25的秘密之後，就很容易擊敗狐幅，就好似當年搵到日本零式戰鬥機一樣。所以，當世衞組織要了解狐幅，要擊敗尼帕病毒，絕對非難事，首先就是不要同狐幅接觸，這亦是最簡單同最直接，如果連咁要求都做唔到，就唔好諗咁多方法防止尼帕病毒。
