我在小學畢業時，老師擔心我們上到中學見到數學感到恐懼，於是替我們補課。在小學只有數學，初中有代數，三角，幾何，名字真係好聽，老師話學得好就好似曹操《短歌行》，「對酒當歌，人生幾何」，學得唔好就好似發夢一樣，「浮生若夢，為歡幾何」，當時我們雖然是小學生，但絕對唔擔心代數，三角，幾何，最擔心就是微積分，我們嘗試過睇那些微積分入門書本，一啲都唔明，根本無從入手。
上到中學，醜婦終須見家翁，第一堂微積分學，老師帶了三本書，同學們都驚驚哋，後來，有同學發覺，那三本書原來是《三國演義》上中下冊，大家都唔明白，又唔係木牛流馬，微積分同《三國演義》又點會扯得埋，老師解讀，話說天下大勢，分久必合，合久必分，這就是微積分，老師再解釋，微積分應該分為微分，積分，先微後積，初學的人就會容易明白。
特朗普在未做總統之前，是做房地產生意，做地產商有一個特點，就是不知不覺應用到微積分學，特朗普在曼克頓第五街有一座樓高五十八層的特朗普大樓，在曼克頓區，唔會有一幅土地空置，舊樓就有不少，業權由一些家族擁有，地產商首先要分化那些家族成員，令到他們同意出售那些舊樓，在取得相當比例的業權後，就要拆了那些舊樓然後重建，特朗普大廈就是這樣得來的。
近日特朗普搞到天下大亂，用的也是微積分學，首先用委內瑞拉小試牛刀，但唔見得成功，雖然以販毒為理由捉了委內瑞拉總統馬杜羅，並打算扶植反對派領袖、諾貝爾和平獎得獎者馬查多上位，但發覺民望不足，結果由副總統宣誓任代總統，委內瑞拉的政府架構沒有改變，雖然特朗普沒有成功，但令到佢應用微積分學更上一層樓。
特朗普突然間話吞併主權屬於丹麥的格陵蘭，並且預言在二〇二六年就會成為美國領土，丹麥是歐盟國家之一，所以，除了丹麥不同意之外，歐盟其他國家亦唔同意，特朗普於是微分歐盟國家，任何一個不同意，就要立刻加徵百分之十關稅，如果到了六月三十日仍然唔同意，就要加徵百分之廿五，估計在如此高昂的關稅之下，有一些歐盟國家影響比較大，一些影響比較小，影響比較大會同意美國吞併格陵蘭，最後歐盟就會分裂，美國有很大機會取得格陵蘭，當特朗普取得格陵蘭之後，就會進行積分，將格陵蘭合併入美國，立刻多了百分之廿三領土，如他自己所說，從未有一個美國總統可以在任內增加咁多領土。
不過，特朗普低估了歐盟的齊心，所有歐盟國家對特朗普表示不滿，同樣以關稅反制美國，同時不排除拋售歐洲國家擁有超過五萬美債，逼使特朗普讓步，最後，特朗普表示不想、不打算、不會吞併格陵蘭，歐盟終於明白，微積分是先微後積，如果大家團結，令到特朗普不能微，就不能積，吞併格陵蘭不是咁容易。
