冠君產業信託行政總裁侯迅（左）。
本地零售市場逐漸回暖，據統計處公布，十月零售業總銷貨價值臨時估計為三百五十二億元（港元，下同），按年升百分之六點九，連升六個月，並高於市場預期。另香港零售管理協會指，升幅主要受惠於「十一黃金周」訪港旅客增加、中秋節送禮效應以及盛事經濟等因素。另外，旅發局初步統計，今年首十一個月，有約四千五百萬旅客人次訪港，按年增一成二，並已超越去年全年總數。臨近聖誕、新年長假期，旅遊業界預計十二月旅客量有望按年增長約百分之五。
數字確現起色，但零售市場復甦勢頭能否延續？冠君產業信託（2778）行政總裁侯迅（Christina）認為，解讀復甦不能單睇表面數字；同去年相比，今年首十個月總銷貨價值接近零增長，銷貨數量更略降百分之一點五。同期網上銷售價值升百分之九點五，此消彼長下實體零售仍存在壓力。另一方面，佢留意到雖然訪港旅客回升，但港人出境外遊意願持續上升，形成消費力雙向流動，對零售業嚟講，競爭對手已由本地擴大至整個亞洲消費目的地。
面對消費轉型、網購成風，Christina視之為「消費者集體升級」，並認為業界需創新求變，方能重拾競爭力。IP經濟、體驗消費等為大勢所趨，冠君旗下朗豪坊順勢加入唔少體驗式店舖，如開設Chiikawa拉麵店，暑假時舉辦《Baby Oysters Mart》打造五感體驗。為捕捉聖誕商機，朗豪坊今年特別邀請英國爆紅品牌Noodoll薯仔家族首度登陸香港，打造期間限定「薯誕百貨」。Christina指，呢類活動正正係實體消費嘅獨特優勢，商場今年共推出五個快閃店，帶動三千萬元銷售額。
租戶組合係商場致勝關鍵，朗豪坊客群以年輕、時尚為主，過去兩年引進超過五十三個新品牌，包含十個全港首店，當中不乏韓國潮牌。Christina透露，韓國新晉時裝品牌Matin Kim及Marithe Francois Girbaud進駐後，銷售額較前租戶大幅增長八成七。佢認為要緊貼潮流，先做到有效嘅品牌調整。
除咗購物，朗豪坊集結辦公大樓同酒店於一身。近年本港商廈市場空置率持續走高，集團積極變陣，為辦公大樓增值兼轉型，打造為一站式身心健康總匯，現時朗豪坊辦公大樓有七成租戶屬美容、健康及醫療行業。為強化定位，集團上月與零售管理協會共同發起《專業優質服務約章》，提供香港首個針對美容、健康及醫療行業設置嘅專業認證與監督，以提高醫美消費信心，同時吸引新客群同新租戶。
冠君拚經濟亦重環保，近年進一步加強ESG投入，將低碳智能科技注入物業管理；另舉辦「ESG Gala」；安排可持續發展表現掛鈎貸款等。集團早前更獲納入恒生可持續發展企業基準指數，「ESG」方面榮獲「AA+」評級。
