洲係我最常去短遊嘅目的地之一，當地天氣宜人，較少出現極端天氣，尤其悉尼、布里斯本（Brisbane）等大城市美食種類多，出行亦算便利。澳洲近年更成為置業熱點，我五年前喺布里斯本買咗層樓投資，上個月見市況好，順勢沽售賺咗一個開。上月底適逢萬聖節，再同太座和幾個老友去布里斯本短遊，順道一探當地物業投資潛力。
陸叔到布里斯本參觀商辦倉儲發展項目。
房地產顧問公司Cotality資料顯示，澳洲十月份全國樓價按月升百分之一點一，創二○二三年六月以來最大單月升幅，全國及多個主要城市樓價均創新高。主要城市價格中，以珀斯（Perth）升幅最勁，達百分之一點九，其後為布里斯本和達爾文（Darwin），分別升百分之一點八和一點六；相比之下，悉尼稍微遜色，月升幅為百分之零點七。
呢波升勢主要源於澳洲央行自二月起三度減息，刺激樓市需求，但同時意味當地通脹將維持高企。面對樓價屢創新高，澳洲政府為壓抑炒風，自今年四月起禁止外國投資者購買已落成現樓，為期至少兩年，務求為本地人釋出更多房屋供應，預計投資熱度將稍為降溫。
除住宅樓市外，物流倉庫亦係另一投資新寵。布里斯本作為澳洲第三大繁忙港口城市，每年處理超過二千八百萬噸貨物，周邊倉庫及物流設施投資價值自然較高。今次過去順道參觀咗幾個倉庫投資項目，普遍為商辦倉儲混合發展，投資者可透過信託基金形式認購，每年獲取固定報酬率。
對比住宅，物流倉庫租戶多為企業，通常着重長期穩定營運，因此租約年期一般較住宅為長，租金收入亦相對穩定。此外，倉庫物業裝修及維修成本較低，管理上亦較為簡便，對海外投資者有一定吸引力，不過投資澳洲物業要留意稅項比較重。
市場前景方面，隨澳洲物流需求擴張，加上電商產業快速發展，該國物流業約佔國內GDP百分之九，而運輸和倉儲支出則約佔GDP百分之五至六。另外，招聘平台SEEK最新研究，運輸和物流領域工作，包括快遞員、貨物搬運工、司機、起重機操作員和倉庫助理等，係澳洲薪資增長最快行業，可見物流業需求殷切。
近年陸續有港資同中資進軍澳洲物流市場，外電引述消息指，領展擬洽購悉尼一座倉庫，估值約一億美元；而京東今年亦於布里斯本投運首個物流中心。根據市場研究機構Mordor Intelligence報告，預計澳洲貨運及物流市場規模今年可達九百九十億美元；至二○三○年有望增長至一千二百二十七億美元，物流倉庫需求誓將有支持。
有見於維持物流和貨運韌性對整體經濟發展嘅重要性，澳洲政府亦正投資升級多個港口主要資產，今年並發布《國家貨運與供應鏈戰略》國家行動計劃，制定明確發展藍圖，以及建立全國貨運投資框架，引領政府和商界喺全國進行貨運網絡投資。
