有台灣老友同我講，一向堅定反共的民進黨議員王世堅，現在信心有所動搖，因為兩地網紅將他過去的政治言論，串連為一首歌叫《沒出息》， 而且仲大受歡迎，有人問王世堅會不會對內地網民反感，佢不但話沒有，仲幾欣賞內地網民風格。今次賴清德有排驚，雖然王世堅其貌不揚，身材五短，郤是民進黨內最受歡迎的人，因為其他民進黨人士，大多數講政治、懂選舉，其他就一概欠奉，偶然出一股清流，又分分鐘被對岸統戰，下次選舉想贏都難。我叫老友不用擔心， 下一次台灣領導人選舉，民進黨應該可以繼續執政，並不是民進黨擊敗國民黨，而是國民黨會自行解體，最低限度都一分為二，打交二對一贏面較大，選舉二對一就很難贏，我都唔係好了解箇中道理，宋楚瑜先生應該好明白。
王世堅明白教育的重要性，所以他話，投資教育，就是投資未來，這句說話台灣做唔到， 香港做到足，所以最新大學排名，百大香港有五間， 二百大有六間， 二百四十九大有七間，甩台灣幾條街。老實說，就算現在台灣急起直追，本來是從從容容，現在要連滾帶爬才有機會做到。
可能我講多咗，見台灣老友唔係幾好面色，於是話王世堅可能話香港人沒出息，已經超過七十歲，仲霸住個立法會議員的位置，有時要見國內領導，發覺那些領導二十年前被他們叫小張小李的，現在當然叫領導，見到咁概情況就應該功成身退，仲可以從從容容。原來名利嘅嘢，得到之後唔係咁輕易放棄，當中有一些真的為利，大拿拿幾十萬月薪的工唔係咁容易搵到；大多數是為名，立法會議員的名字在很多宴會都會排第一位，唔係咁容易可以放棄，就算自己肯，家人都唔肯，在從從容容的時候唔退落嚟，最後就要連滾帶爬。
有消息傳出，中央政府唔希望超過七十歲仲去選立法會，一時之間人生百態表露無遺， 有人衝冠一怒，有人梨花帶雨，頗有連滾帶爬味道。不少餞行宴要取消，都唔知邊個餞邊個，既然大家牛衣對泣，不如取消好過。有人愁就會有人快樂，不少有意參加立法會的人，以前苦無機會， 現在井岡山吹起號角，大家又可以起跑了。
台灣老友可能唔知道，王世堅的沒出息可能暗示香港投資者，兩年前從從容容的時候唔賣樓，現在如果一定要賣就要連滾帶爬，希望香港物業投資者可以渡過今次難關。
