有老友最近問我，做過咁多場演講，有沒有試過冇掌聲，我話從未試過，但掌聲同噓聲一起就經常出現。一般來說，如果一場演講的掌聲很少，就會出現噓聲，但這不是定律，因為香港聽眾大多數有紳士風度，就算講者講得唔好，最多唔鼓掌，但不會發出噓聲。
最近美防長赫格塞斯一場對着八百個美國准將以上級的將領演講，竟然沒有掌聲，就算特朗普叫大家可以隨意拍掌，但所有將領都不為所動，不過也沒有噓聲，因為特朗普話大家可以唔拍掌，甚至可以離開，但軍旅生涯恐怕會被終止，雖然冇講話唔准噓，但試問邊會有將領夠膽以身試法，唯有唔鼓掌來表達不滿。
很多外地評論員話今次是赫格塞斯烽火戲諸侯，我並不同意，現在並不是美國有難，叫駐外地美軍班師回朝。在開會之前，很多人認為美防長會大幅削減將領人數，甚至會關了一些無關重要的基地，畢竟防長在三月時亦講過將會削減兩成將軍人數。老實說，防長真係托大（大意），做得美國將軍以及基地司令，一定要有濃厚政治背景，防長只是流水的官，不會有咁大權力，拜登時期的美防長係邊個都冇人記得，而事實上美防長今次集結咁多將領聽他的演講，本來打算揚威立萬，但沒有掌聲支持，代表所有將領都不同意他的觀點，變成攞架嚟丟，今次赫格塞斯真係偷雞唔到蝕拃米。
有人唔明白點解防長做咁戇居的事，特朗普不但沒有反對，甚至大力支持？老實說，美防長懂得特朗普心態，現在的特朗普已經諗緊點樣可以繼續做總統，其實只有一個機會，就是美國打仗，好似現在烏克蘭的澤連斯基，俄烏戰爭一日不停，澤連斯基一日可以做總統，所以， 赫格塞斯將國防部改為戰爭部，代表美國準備打仗，特朗普可以繼續做總統，有咁大誘因，特朗普點會唔支持。
但有人話，唔係美國想打仗就可以打仗，老實說，如果美國想打，一定可以打，例如強逼加拿大做美國第五十一州，霸佔格陵蘭，甚至入侵巴拿馬。不過，好彩有中國，軍事實力有相當，美國未必夠膽挑起戰火。例如最近鎖死卡爾的防空系統，令以色列戰機可以轟炸在卡塔爾的哈馬斯談判團，如果沒有中國紅旗-9防空系統，以色列以至美國以後就可以為所欲為，而且出師有名，戰爭一開始，特朗普可以繼續做美國總統。現在紅旗-9已經陸陸續續安裝在中東其他國家，以色列就要收斂一些，不但唔可以肆無忌憚轟炸其他中東國家，仲要同卡塔爾講對唔住，真係想都想唔到。
