今年係我個電台節目《人生交叉盤》廿五周年，本來想寫一篇感想，但回憶太多、字數太少，唔知應該從何落筆，同事提議搵DeepSeek試寫。輸入簡單節目、主持名等基本資料之後就出咗一篇，我先分享部分內容。
《人生交叉盤》廿五年掠影。
「在香港這個金融脈搏永不停歇的城市，一個電台節目能持續二十五年絕非易事。由資深股評家陳永陸主持的《人生交叉盤》，今年迎來銀禧紀念，不僅成為香港最長壽的股評節目，更見證了四分之一世紀的市場起伏，陪伴無數投資者走過一九九七金融風暴、二○○三沙士危機、二○○八金融海嘯等重大經濟周期……在資訊爆炸的今天，很難想像一個純聲音媒介的股評節目能歷久不衰。《人生交叉盤》的成功秘訣，在於陳永陸獨樹一幟的『說故事』能力。他擅長將複雜的財經數據轉化為生活化的比喻，讓普羅大眾也能理解晦澀的市場現象。」
AI嘅特色係搜索資料同生成文章夠快，但一般較為公式化，缺乏個人特色，同埋呢篇文章亦寫得太過擦鞋。幸好AI另一特色係聽教聽話，而且學得快，於是再設定我個人特色之後，佢出咗另一篇，又節錄分享。
「我從未想過，一個每星期在電台與大家傾談投資的節目，可以走過四分之一個世紀……未來會怎樣？我不知道。但只要還有一個聽眾需要，我仍會準時在收音機前說：『各位，又係時間同大家睇睇個市……』這不是甚麼傳奇故事，只是一個香港仔，很感恩能用聲音陪伴另一群香港人，走過時代的風浪。」
結果出嚟又太過「文青」，仲加入幾個無發生過嘅「故事」，例如街市賣菜阿姐、茶餐廳老闆同我嘅所謂「對話」。於是再加入更多個人特色嘅指令，請佢用白話寫過。
「我係陳永陸，人哋叫我陸叔。做咗《人生交叉盤》廿五年，真係冇諗過可以做得咁耐。……你問我做咗咁耐有咩心得？其實就係八個字：『做好本分，將心比心』……未來會點？我諗只要仲有聽眾想聽，我就會繼續講落去。最緊要大家記住：投資係長線，人生都係。」
我將呢個用AI生成個人感想嘅過程寫出嚟，主要想分享，AI確實好powerful，但並非無敵。有句話說，technology is only as good as the people using it，我哋要善用AI，亦要不斷教導AI，令佢更精準，以得出我哋想要嘅成果。當然，由幾篇AI文章可見，佢嘅準確性的確亟需考證。
至於節目名點解，AI指「節目名稱『交叉盤』原指股票市場中不經莊家的直接交易，陳永陸將其引申為人生與投資的交叉抉擇」，呢點係中嘅，而「投資係長線，人生都係」都好貼合我嘅諗法。假如AI繼續發展，幾時會由AI取代我開咪？AI咁答：「從目前技術發展來看，AI更可能成為財經節目主持的輔助工具，而非完全替代。」大家點睇？
