全球微塑膠污染加劇，人類大腦逐步被塑料佔據，學術期刊《自然醫學》（Nature Medicine）早前引述美國一項研究嘅驚人數據，原來短短八年間人體大腦嘅微塑膠含量激增五成；其中患有認知障礙症嘅群體中，腦內塑膠濃度更係正常人六倍。事實上，聯合國環境署統計顯示，全球每年生產塑膠垃圾高達四億噸，當中只有不足一成被回收，並至少有逾千萬噸塑料流入大海，呢類睇唔見嘅塑膠並非眼不見為淨，而係會污染海洋食物鏈，最終「輪迴」至人體。
綠環（Eco Hope）聯合創辦人歐陽浩為（中）和總監鄔家麟（右一）。
塑膠危機已成為全球共識，去年年底全球逾百個國家代表聚首韓國，為《全球塑膠公約》進行第五輪會議，旨在就塑膠污染促成全球首份具法律約束力條約。雖然談判未能達成協議，但已計劃於今年八月恢復討論，到時有望作最後定案。另有唔少國家已陸續強徵「塑膠稅」，其中歐盟係減塑先鋒，早於二○二一年已就不可回收嘅塑膠廢物，向所有會員國徵收每公斤零點八歐元塑膠稅；而英國塑膠稅今年亦加碼至每噸二百二十多英鎊，務求達至「絕膠」。
至於香港，據環保署最新統計，塑膠佔全港固體廢物約兩成，但隨港人環保意識提高，加上走塑政策出台，近年塑膠棄置量有回落趨勢。當中「走塑令」實施逾一年，環境及生態局指八成連鎖食店顧客已唔用即棄餐具，估計每年可減少六千萬套餐具。
源頭減廢固然重要，不過要達至全民走塑仍係漫漫長路，因此要同塑料回收重用相輔而行。塑膠物料回收一直難以大規模推行，主因係成本較高，經濟價值相對低。不過近年本地回收業界積極轉型，透過科技將回收塑膠升級再造，綠環（Eco Hope）就係其中一員。
公司聯合創辦人歐陽浩為（Howard）和總監鄔家麟（Kenny）早前同我分享，Howard原本從事塑料貿易二十多年，眼見近年不論本地定內地，環保政策連番出台，開始萌生業務轉型念頭，所以自六、七年前起轉型至塑膠回收，並於兩年前力攻塑料升級再造，務求以舊經驗打造新業務。為提高回收率，綠環夥拍大型物流公司，提供上門回收服務；另設大型自家回收工場，配備先進處理技術，一條龍處理回收塑膠，轉化為可再用材料，實現cradle-to-cradle。
不過香港回收風氣未盛，以全港最大準食品級膠樽回收廠為例，每月可處理高達一千二百噸膠樽，但實際回收處理量卻不足兩成。公司分析，回收率偏低主要由於公民教育同回收透明度不足，針對呢兩大痛點，綠環積極做回收推廣，例如同NGO聯手邀請小朋友參觀回收；透過社交平台分享回收及轉化流程等，線上線下「塑」造綠色未來。
