一年一度香港電影金像獎頒獎禮結束了，一般人認為結果大致正常，沒有令人失望，但我有唔同想法，當大家知道香港一年只有十幾套電影上畫，就算攞到金像獎都唔值得慶祝。
我讀小學時，有一日阿媽叫我去睇戲，戲名叫《撈世界要醒目》，我話唔去，睇到個戲名都知道唔好睇，阿媽話一定要去，因為套戲是一個在澳門水務局工作的人投資，女主角吳君麗會出現，如果我唔去就搵家姐去，我始終唔去，認為浪費時間，多年後我發覺做錯了，對於一些小本經營的電影應該支持，如果沒有那些電影，好似牡丹沒有綠葉，最後變成孤芳自賞。
香港電影業有一段時間非常蓬勃，出現很多小本經營電影，拍攝速度十分之快，據聞連劇本都冇，導演與演員即夾即拍，菲林太貴，take 2都唔使，大約一個星期便可以完成，大家叫那些電影做七日鮮。老實說，的確是粗製濫造，但亦有其好處，就是量多，可以飬活很多人，包括電影院，如果沒有足夠供應量，電影院亦很難生存，由於量多，即使粗製濫造，久唔久亦會出現一些好戲，例如《如來神掌》，現在大家仲記得萬佛朝宗。
七日鮮的粵語片式微之後，隔了一段時間再次蓬勃，出了很多名導演，名演員，有不少精彩電影，但亦有不少類似七日鮮兼唔合邏輯電影，例如《精裝追女仔》，又唔知點解非常賣座，很多人唔明白，電影票價一律，點解要睇那些無厘頭電影。其實，如果能夠抽時間買飛睇一些無厘頭電影，算是對香港電業實際支持，唔講唔知，有足夠資源，拍出一些叫好叫座的電影是唔難，但在財政緊絀之下，拍出一些無厘頭而又賣座電影是很困難，現在電影行業就是冇人願意拍一些小本經營的電影，在電影行業的人很難生存，電影院已經閂了唔少，市場上又唔係有咁多個楊老闆，繼續下去，電影可能會變成式微行業，甚至現在已經係，電影業又如何可以翻生。
現在有一些視頻電影，可以咁講，大多數是垃圾，但有不少香港過氣三四線演員也會拍那些視頻電影，現在那些視頻電影無論在布景，服飾，演員都有長足進展，證明那些視頻電影是有觀眾。所以，要挽救香港電影業，就是業界要多拍一些小本製作，就算內容無厘頭都冇所謂，海量的小本製作才可以挽救香港電影，我們以為荷里活只會拍A級片，其實，在合約上拍A級片的公司要拍一些C級片，否則，沒有足夠供應量，荷里活都捱唔住。
