養貓狗嘅朋友都知道，在香港帶毛孩出街真係好頭痛！作為資深貓奴的自己，帶貓咪睇醫生要諗，因為除的士、私家車外，搭車好成問題。但係睇吓外國，日本、英國、台灣等地，早就准許寵物搭公共交通工具，只要放喺袋或箱就得，仲可以同主人一齊去旅行！香港作為國際城市，點可以咁落後？由五月一日開始，港鐵旗下輕鐵推出「貓狗同行」試行計劃，總算踏出寵物友善第一步！
輕鐵試行「貓狗同行」？規矩多但好合理！
講真，輕鐵咁逼，如果突然有隻狗狗喺度「汪汪」或貓咪「喵喵」，畫面真係有些混亂。所以港鐵設定三大規矩，因為輕鐵作為高載客量的運輸系統，必須平衡各方需求，因此設定相關限制合情合理。例如，要求寵物全程置於專用袋內、僅限非繁忙時段乘搭，並在車廂特定區域停留，這些措施與國際慣例相符，能有效減少對其他乘客的影響。試行期間，港鐵還加強了車站指引與職員協助，顯示港鐵對計劃的謹慎態度，值得支持，係要俾個Like港鐵，平衡主人同其他乘客嘅需要！
主人要做足準備 乘客都要學識包容
既然主人想帶寵物搭車，自己必須負上責任！其中，袋要通風、狗狗要適應、仲要帶定尿墊，萬一主子們「忍唔住」，就要立即清理，唔好留低「驚嚇」俾其他乘客。另一方面，其他乘客見到寵物上車，唔使表現太驚嚇，只要主人守規矩，其實狗狗及貓咪有時候可能仲乖過小朋友，而大家互相體諒，也是營造真正嘅寵物友善社會的重要一步！
香港幾時先可以似外國咁「寵物自由行」？
今次輕鐵試行計劃係好開始，但長遠來講，香港嘅寵物政策仲有好大進步空間！例如開放更多交通工具、增加寵物友善設施，甚至學台灣咁，准許寵物入商場同餐廳。當然，要達到呢個目標，主人同社會都要一齊努力。希望有一日，我哋可以同毛孩一齊搭地鐵、去Cafe、甚至去旅行，真正實現「寵物同行無障礙」！
P.S. 各位貓奴狗奴，毛孩係我哋嘅心肝寶貝。為咗可以繼續帶佢哋去更多地方，享受更多樂趣，我哋一齊努力，做個負責任嘅寵物家長！
艾明資本董事總經理庾婉華（Avy Yu)
曾任職上市公司投資者關係部門，現時為專業投資者，金融財務學碩士，定期撰寫內地文章並每月錄得近百萬閱讀量。筆者並出任商業顧問公司執行董事至今，專長引入及深化投資者關係及企業融資策劃方案。
投資涉及風險，本文內容為供參考，亦不構成投資建議、邀約、購入、出售任何產品。
