我唔講大家未必知道，執笠群組亦沒有報道，新加坡馬場在今個月就會執笠，將一百二十公頃土地交回給新加坡政府，用作民生住宿及設施，當這個消息在五月傳出的時候，我當然非常開心，說到底香港少了一個競爭對手，但不少政見不同的人指責香港政府，沒有新加坡政府的高瞻遠矚，只是識得收博彩稅，其實，我反而覺得政府高瞻遠矚，馬場並不是收博彩稅咁簡單，而是一個社會高端人士交流的地方，香港引入咁多優才專才，如果冇一個地方給他們聚首，簡直是浪費了優才計劃，嚴格來說，除了股票市場之外，香港勝在有馬場。

我本來唔打算講股票，但近日股市急升，陳茂波笑到見牙唔見眼，我估計今年股市最少為政府帶來千億元印花稅收入，預計只有五百億元，當中仲包括物業印花稅，大大紓緩政府財赤壓力，就算地產商唔買地都冇所謂，土地不需要以低價賣走，政府有能力唔賣地，供應必定減少，對於樓市是好消息抑或壞消息，唔同的人有唔同見解。

十．一國慶，有內地老友在馬場訂了包廂，我對賽馬冇乜興趣，本來唔打算去，但內地老友話有很多內地名人、靚女，都有睇我在《東周刊》專欄，係我fans，咁樣講唔去都唔得，去到之後真係無地自容，我不便指名道姓，但真的是內地名人，連留在上海，白天不出來的一級靚女都出來，食物酒水不在話下，我發覺他們真的是很熟馬會。老友話，馬會現在已經變成內地名人的交流勝地，一次過可以見到一大班由唔同省市來港老友，就算冇預約，臨急臨忙都可以成局，只是多一個人少一個人而已，馬場點只跑馬咁簡單。

白天不出來的靚女問，近幾日香港股市急升接近五千點，但地產股反應不大，是否香港地產仍然處低潮？既然有咁多優才來港，香港地產又點會處於低潮？既然靚女問到，我如實作答，我覺得現在有能力買樓的人不買樓，是屬於有胡唔食，罪大惡極，股市今次急升，紓緩了很多人的財政壓力，他們放在銀行的股票價值上升，銀行就唔會call loan，銀行唔call loan，他就不用賤價賣樓，不少業主已經收回放售中物業，最低限度都會反價，那些人要買平樓就唔係咁容易，不過，他們並不是最大受害者，那些在無必要情況下將自住單位賣走的人才是，因為他們是「出銃」畀人食胡的人，講講下我發覺大家都集中聽我講樓市，冇人聽老友重金禮聘的賽馬專家講馬經，今次真係罪過罪過，唔覺意踩場，希望賽馬專家唔好介意，賽馬專家話冇問題，馬場是一個交流地方，如果大家冇共同話題，就可以講下賽馬，如果有就毋須理會。